وزیراعظم شہباز شریف نے معصوم پاکستانیوں کو جھانسہ دے کر غیر قانونی طریقوں سے بیرون ملک لے جانے والوں کے خلاف سخت کارروائی کی ہدایت کردی۔
تفصیلات کے مطابق وزیراعظم شہباز شریف کی زیرصدارت یونان میں کشتی الٹنے کے حادثے میں پاکستانیوں کی اموات اور انسانی اسمگلنگ کی روک تھام کے حوالے سے اجلاس ہوا۔
اجلاس کے دوران شہباز شریف نے 2023 کے کشتی حادثے کے بعد ایسے عناصر کے خلاف کارروائی میں سست روی پر برہمی کا اظہار کیا، وزیراعظم نے سست روی میں ملوث افسران کے خلاف کارروائی کرنے کی ہدایت کردی۔
اس موقعے پر وزیر اعظم نے کہا کہ 2023 میں یونان کے اسی علاقے میں ایک واقعہ ہوا جس میں 262 پاکستانی جان سے گئے، انسانی اسمگلنگ پاکستان کیلئے دنیا بھر میں بدنامی کا باعث بنتی ہے،انسانی اسمگلنگ کو روکنے کیلئے ٹھوس اقدامات کی ضرورت ہے۔
وزیر اعظم شہبازشریف کا کہنا تھا کہ سست روی سے لئے گئے اقدامات کی بدولت ایسے واقعات کا دوبارہ ہونا لمحہ فکریہ ہے، بین الاقوامی اداروں کیساتھ تعاون بڑھایا جائے تاکہ ایسے واقعات کی روک تھام کی جا سکے۔
خیال رہے کہ چند روز قبل یونان کے جنوبی جزیرے گاوڈوس کے قریب کشتی الٹنے کے بعد کم از کم 5 تارکین وطن ڈوب کر ہلاک جب کہ کئی لاپتا ہوگئے تھے۔
