اسلام آباد: وزیر اعظم شہباز شریف نے سعودی عرب سمیت برادر ممالک پر زور دیا ہے کہ وہ خطے میں کشیدگی میں کمی کیلیے باھرت پر دباؤ ڈالیں۔
سرکاری نیوز ایجنسی اے پی پی کے مطابق وزیر اعظم شہباز شریف سے سعودی عرب کے سفیر نواف بن سعید المالکی نے ملاقات کی جس میں وزیر اعظم نے خادم الحرمین الشریفین شاہ سلمان بن عبدالعزیز السعود اور ولی عہد و وزیر اعظم شہزادہ محمد بن سلمان بن عبدالعزیز السعود کیلیے نیک تمناؤں کا اظہار کیا۔
انہوں نے سعودی قیادت اور عوام کا شکریہ ادا کیا کہ انہوں نے ہمیشہ پاکستان کے ساتھ یکجہتی کا اظہار کیا۔
یہ بھی پڑھیں: ‘پاکستان پہلگام واقعے کی غیرجانبدارانہ انکوائری کیلیے تیار ہیں’
پہلگام واقعے کے بعد جنوبی ایشیا میں امن و امان کی موجودہ صورتحال پر پاکستان کا مؤقف بیان کرتے ہوئے شہباز شریف نے کہا کہ پاکستان نے دہشتگردی کی تمام شکلوں اور مظاہر کی مذمت کی ہے، پاکستان نے گزشتہ برسوں میں انسداد دہشتگردی کی کوششوں میں بڑی قربانیاں دی ہیں جو کہ نہ صرف پاکستان بلکہ پوری دنیا کے تحفظ کیلیے انتہائی اہم ثابت ہوئی ہیں۔
انہوں نے بغیر کسی ثبوت کے پہلگام واقعہ سے پاکستان کو جوڑنے کے بے بنیاد بھارتی الزامات کو یکسر مسترد کیا اور واقعہ کی شفاف اور غیر جانبدار بین الاقوامی تحقیقات کے اپنے مطالبے کا اعادہ کیا۔
سعودی عرب سمیت دوست ممالک کے تعاون سے گزشتہ 15 ماہ کی محنت سے حاصل ہونے والے معاشی فوائد کو مستحکم کرنے پر حکومت کی مکمل توجہ کو اجاگر کرتے ہوئے وزیر اعظم نے کہا کہ پاکستان کی کامیابیوں کو خطرے میں ڈالنے اور ملک کو اقتصادی ترقی کی راہ سے ہٹانے کی بھارتی کوششیں ناقابل فہم ہیں۔
انہوں نے جنوبی ایشیا میں امن و استحکام کیلیے پاکستان کی خواہش کا اعادہ کیا۔
سعودی سفیر نے اس اہم معاملے پر اپنے خیالات کا اظہار کرنے پر وزیر اعظم کا شکریہ ادا کیا اور کہا کہ سعودی عرب خطے میں امن و سلامتی کیلیے پاکستان کے ساتھ مل کر کام کرنا چاہتا ہے۔
