لاہور: العزیزیہ اور فلیگ شپ ریفرنسز پر فیصلہ محفوظ ہونے پر سابق وزیراعلیٰ پنجاب شہباز شریف نے کہا ہے کہ اللہ سے دعا ہے انصاف کا بول بالا ہو اور بلا امتیاز و تفریق فیصلہ آئے۔
تفصیلات کے مطابق سابق وزیراعلیٰ پنجاب شہباز شریف سے العزیزیہ اور فلیگ شپ ریفرنس پر فیصلہ محفوظ ہونے پر سوال کیا گیا تو انہوں نے کہا کہ اللہ سے دعا ہے انصاف کا بول بالا ہو اور بلا امتیاز و تفریق فیصلہ ہو۔
شہباز شریف نے کہا کہ یہی طریقہ ہے ملک آگے جاسکتا ہے، کفر کا نظام چل سکتا ہے ناانصافی کا نہیں، امید ہے انصاف کا بول بالا ہوگا۔
شہباز شریف سے سوال کیا گیا کہ فیصلہ نواز شریف کے خلاف آیا تو کیا لائحہ عمل اختیار کریں گے جس پر انہوں نے کہا کہ آپ ایسے سوال کیوں کرتے ہیں ہمیں اللہ سے دعا کرنی چاہئے۔
مزید پڑھیں: نواز شریف کے خلاف کرپشن ریفرنسز پر فیصلہ محفوظ کرلیا گیا
واضح رہے کہ آج احتساب عدالت میں سابق وزیراعظم نواز شریف کے خلاف کرپشن ریفرنسز کی سماعت مکمل کرلی گئی، دونوں ریفرنسز میں فریقین کے حتمی دلائل مکمل ہوچکے ہیں جس کے بعد فیصلہ محفوظ کرلیا گیا۔
احتساب عدالت میں ہونے والی سماعت میں جواب الجواب دلائل پیش کیے گئے جس کے بعد ریفرنسز کا فیصلہ محفوظ کرلیا گیا۔ فیصلہ 24 دسمبر کو سنایا جائے گا۔
سماعت کے دوران نواز شریف کے وکیل خواجہ حارث نے مزید دستاویزات جمع کروانے کے لیے ایک ہفتے کی مہلت کی استدعا کی جسے مسترد کردیا گیا۔
