لاہور: سابق وزیر اعظم و صدر مسلم لیگ (ن) شہباز شریف کا کہنا ہے کہ ملک میں ترقی اور خوشحالی چاہتے ہیں تو 21 اکتوبر کو نواز شریف کا والہانہ استقبال کرنا ہوگا۔
پنجاب تاجر کنونشن سے خطاب کرتے ہوئے شہباز شریف نے کہا کہ اگر معاشی ترقی کرنی ہے تو سیاسی استحکام لانا پڑے گا، غربت اور مہنگائی کا خاتمہ کرنا ہے تو پیار و محبت کو پروان چڑھانا ہوگا، پاکستان کو پیروں پر کھڑا کرنا ہے تو شہدا کی توقیر کرنی ہے۔
شہباز شریف نے کہا کہ ہمیں اس ملک سے تقسیم کو ختم کرنا ہوگا، یہی وہ مقصد ہے جس کیلیے نواز شریف 21 اکتوبر کو پاکستان آ رہے ہیں، آپ ان کے چاہنے والے ہیں تو نظر دوڑائیں ان کے دور میں ترقی ہوئی یا گالم گلوچ ہوئی۔
انہوں نے کہا کہ نواز شریف آج سے ٹھیک 9 دن بعد مینار پاکستان پر تشریف لائیں گے، اللہ کو منظور ہوا تو ان کی قیادت میں پاکستان ترقی کا سفر وہیں سے شروع کرے گا۔
ان کا کہنا تھا کہ اورنج لائن کا منصوبہ نواز شریف کے دور میں لگا، اگر رنگ روڈ نہ ہوتا تو لاہور کی ٹریفک کا کیا حال ہوتا، لاہور میں فلائی اوور اور سڑکوں کا جال نہ ہوتا تو ٹریفک کا کیاحال ہوتا؟
سابق وزیر اعظم نے کہا کہ جب 2017 میں نواز شریف کا سفر ختم کیا گیا تو پاکستان میں اندھیرے ہوئے، ان کی قیادت میں مخلوط حکومت نے ریاست کو بچایا سیاست کو نہیں، اگر خدانخواستہ ریاست نہ بچتی تو سیاست تو دفن ہو جاتی۔
