راولپنڈی: وفاقی وزیر برائے انسداد منشیات شہریار خان آفریدی نے اینٹی نارکوٹکس فورس کے ہیڈ کوارٹرز کا دورہ کیا جہاں انہوں نے منشیات کی روک تھام کے لیے کی گئی ادارے کی کاوشوں کو سراہا۔
تفصیلات کے مطابق ترجمان اے این ایف کا کہنا ہے کہ وفاقی وزیر برائے انسداد منشیات شہریار خان آفریدی نے اینٹی نارکوٹکس فورس کے ہیڈ کوارٹرز کا دورہ کیا۔ ڈائریکٹر جنرل اے این ایف میجر جنرل محمد عارف ملک نے اعلیٰ افسران کے ہمراہ وفاقی وزیر کا استقبال کیا۔
ڈی جی اے این ایف نے وفاقی وزیر کو بریفنگ دی جس میں بتایا گیا کہ اے این ایف منشیات کے خاتمے کے لیے ملک بھر میں آگاہی مہمات چلانے میں مصروف عمل ہے۔
ترجمان کے مطابق ڈی جی اے این ایف نے وفاقی وزیر کو بتایا کہ رواں سال محکمے نے 7 سو 22 مقدمات درج کر کے 8 سو 29 ملزمان کو گرفتار کیا۔ بریفنگ کے دوران وفاقی وزیر کو اے این ایف کی آپریشنل کامیابیوں کے متعلق بھی آگاہ کیا گیا۔
وفاقی وزیر نے اے این ایف کی پیشہ وارانہ کامیابیوں اور قومی و علاقائی سطح پر منشیات کی روک تھام کے لیے کی گئی کاوشوں کی تعریف کی۔
ترجمان کا کہنا ہے کہ انہوں نے محکمے کے ملازمین کی تنخواہیں اور شہدا پیکج کو پولیس اور دیگر قانون نافذ کرنے والے اداروں کے برابر لانے کی یقین دہانی بھی کروائی۔
