اسلام آباد : وفاقی وزیر ریلوے شیخ رشید احمد کا کہنا ہے کہ اے سی کلاس کے کرائے عید کے بعد بڑھائے جانے کا امکان ہے۔
تفصیلات کے مطابق قومی اسمبلی کی قائمہ کمیٹی کے اجلاس میں شیخ رشید احمد نے موجودہ حکومت کے پہلے 6 ماہ کے دوران کی مالی حالت سے متعلق آگاہ کیا۔
شیخ رشید احمد نے اجلاس میں بتایا کہ پاکستان ریلوے کو مسافر ٹرینوں سے 25 ارب سے زائد کی آمدن ہوئی ہے جو گزشتہ سال کے اسی عرصے کے دوران 23 ارب روپے سے زائد تھی۔
وفاقی وزیرریلوے نے کہا پاکستان ریلوے نے عالمی منڈی میں تیل کی قیمتوں میں اضافے کے باوجود ٹرینوں کے کرایوں میں اضافہ نہیں کیا۔
یاد رہے کہ گزشتہ ہفتے لاہور میں شیخ رشید احمد کا کہنا تھا کہ سرکلر ریلوے کے حوالے سے سپریم کورٹ کے احکامات پر 15 روز میں عملدرآمد کی کوشش کریں گے، سرکلر ریلوے پر تجاوزات کے خاتمے کے لیے ہرممکن کوشش کریں گے۔
وفاقی وزیر ریلوے کا کہنا تھا کہ سرکلر ریلوے کے حوالے سے حکومت سندھ کے ساتھ ہرممکن تعاون کیا جائے گا تاہم امن وامان قائم کرنا سندھ حکومت کا کام ہے۔
شیخ رشید احمد کا کہنا تھا کہ ریلوے کی نجکاری کے حوالے سے خبروں میں کوئی صداقت نہیں ہے۔
