راولپنڈی: پاکستان مسلم لیگ عوامی کے سربراہ شیخ رشید احمد نے کہا ہے کہ جن سے مذاکرات کرنے ہیں انہیں آپ گرفتار کررہے ہیں۔
اے آر وائی نیوز سے گفتگو کرتے ہوئے پاکستان مسلم لیگ عوامی کے سربراہ شیخ رشید احمد نے کہا کہ محلے میں نعرے لگ رہے ہیں، ڈپریشن میں ہوں اس سے اچھا ہے بندہ جیل چلاجائے، 13 جماعتوں کی خواہش ہے کہ عمران خان نااہل ہو، جیل میں ہو۔
انہوں نے کہا کہ اداروں کو بخوبی علم ہے حکومت کی اہلیت، صلاحیت صفر ہے، انکی سیاسی موت ہوچکی، عدالتوں کے احترام کے بجائے عدالتوں سے گرفتاریاں کی جارہی ہیں۔
سربراہ عوامی مسلم لیگ شیخ رشیدکا کہنا تھا کہ ملک دیوالیہ ہوتا ہے یا لوگ بھوکے مریں اس سے شریف، زرداری، مولانا کو فرق نہیں پڑتا، ان کا مسئلہ صرف عمران خان اور انتقام ہے، یہ سمجھتے ہیں عمران خان کو ختم کر کے پی ٹی آئی کی سیاست ختم ہوجائےگی لیکن انہیں یہ یہ نہیں پتا کہ عمران خان کو ختم کیاگیا تو پی ٹی آئی اور مضبوط ہوجائےگی۔
شیخ رشید نے کہا کہ یہ عوام میں جانے کے قابل نہیں ،جس چینل پر آتے ہیں لوگ چینل بدل لیتے ہیں، جن سے مذاکرات کرنے ہیں انہیں آپ گرفتارکررہے ہیں، حکومت ایسے اقدام کر کے خود اپنے پاؤں پر کلہاڑی مار رہی ہے ۔
سابق وفاقی وزیر نے کہا کہ لیڈروں کو عدالت سے گرفتارکیا گیا، عوام نے احتجاج خود لیڈ کیا، احتجاج کی آڑ میں توڑ پھوڑ قابل قبول نہیں ہے، نیب قانون میں کی جانیوالی ترامیم کا فائدہ عمران خان کو ہوگا۔
