راولپنڈی: عوامی مسلم لیگ کے سربراہ شیخ رشید نےلال حویلی خالی کرنےکےحکم کوعدالت میں چیلنج کردیا۔
تفصیلات کے مطابق عوامی مسلم لیگ کے سربراہ شیخ رشید نےلال حویلی خالی کرنے کے حکم کیخلاف درخواست دائر کردی۔
درخواست میں کہا کہ لال حویلی سابق وفاقی وزیر کی ملکیت ہے، سیاسی انتقامی کارروائی کی گئی ، مقدمہ کی تاریخ 24 اکتوبر مقرر ہے اس کے باوجود غیر قانونی نوٹس بھیجا گیا۔
سابق وفاقی وزیرشیخ رشید کے بھتیجےشیخ راشد شفیق بھی عدالت پیش ہوئے ، وکیل سردار عبدالرازق نے کہا کہ لال حویلی شیخ رشید احمد کی کئی دہائیوں سے ملکیت ہے۔
ایڈیشنل سیشن جج خورشید عالم بھٹی نے ڈائریکٹرمتروکہ وقف املاک کونوٹس جاری کر دئیے اور کل منگل کو مکمل ریکارڈ سمیت عدالت میں طلب کرلیا۔
عدالت نے ڈائریکٹرمتروکہ وقف املاک کو کوئی غیر قانونی اقدام نہ کرنے کا بھی حکم دیا۔
گذشتہ روز متروکہ وقف املاک نے شیخ رشید کو جائیداد سے بے دخلی کا نوٹس جاری کیا تھا ، جس میں شیخ رشید کو 7 روز کے اندر جگہ خالی کرنے کی ہدایت کی گئی، جائیداد میں لال حویلی کی جگہ بھی شامل ہے۔
متروکہ وقف املاک کی جانب سے 19 اکتوبر کو آپریشن کرنے کا فیصلہ بھی کیا گیا ہے، ایف آئی اے کو بھی کارروائی میں حصہ بنایا جائے گا۔
