رواں ماہ موہن جو دڑو ایکسپریس چلائی جائے گی: شیخ رشید -
The news is by your side.

Advertisement

رواں ماہ موہن جو دڑو ایکسپریس چلائی جائے گی: شیخ رشید

لاہور: وفاقی وزیر ریلوے شیخ رشید کا کہنا ہے کہ غریب کے لیے 100 روپے ٹکٹ کم کرنا پڑا تو کروں گا۔ 16 تاریخ کو موہن جو دڑو ایکسپریس چلائی جائے گی۔

تفصیلات کے مطابق وفاقی وزیر ریلوے شیخ رشید احمد نے نیوز کانفرنس کرتے ہوئے کہا کہ ایک ماہ میں مسافروں کے لیے چوتھی ٹرین چلائی ہے، انشا اللہ 16 تاریخ کو موہن جو دڑو ایکسپریس چلائی جائے گی۔

انہوں نے کہا کہ 5 کروڑ مسافروں کی تعداد کو 7 کروڑ تک لے کر جائیں گے، 10 فریٹ کو بڑھا کر 12 تک کرنا چاہتے ہیں۔

شیخ رشید نے کہا کہ جو ڈی ایس اپنی پٹری کی مینٹیننس کا خیال نہیں کرے گا وہ معطل ہوگا، ریلوے کے پیسے جن پر واجب الادا ہیں، وصولی کے لیے اقدام کر رہے ہیں۔ ریلوے کے 15 آئل ڈپو کا فوری آڈٹ کروانے کا فیصلہ کیا ہے۔ آڈٹ میں جو لوگ ذمے دار ہوئے ان کے خلاف کارروائی ہوگی،

ان کا کہنا تھا کہ قلی اب پھر سے لال وردی اور لال پگڑی پہنیں گے، کراچی سے پشاور تک اسٹینڈرڈ گیج ٹریک بچھائیں گے۔ ریلوے کی بہتری کے لیے عمران خان جو فیصلہ کریں گے وہی لاگو ہوگا۔

شیخ رشید نے بتایا کہ ای سی سی نے 70 ہزار پری پیڈ میٹر لگانے کا فیصلہ کیا ہے، 100 دن میں 10 نئی ٹرینیں چلائی جائیں گی۔ این ایل سی کے 10 انجن ہیں جن کا 5 کروڑ روپے ماہوار خرچہ ہے۔ ریلوے کی حالت ایسی ہے کہ اب فیصلے نہ کیے تو کبھی نہیں کر پائے گی۔

انہوں نے مزید کہا کہ غریب کے لیے 100 روپے ٹکٹ کم کرنا پڑا تو کروں گا۔ سی پیک کا سب سے بڑا حامی ہوں، سی پیک پاکستان کے لیے ریڑھ کی ہڈی حیثیت رکھتا ہے۔

شیخ رشید کا کہنا تھا کہ دھند میں ٹرینیں چلانے کے لیے انجنوں پر آلات لگائیں گے، ریلوے میں غفلت برتنے والے افسران کو معاف نہیں کیا جائے گا۔ 10 ہزار نوکریاں چاہئیں ورنہ ریلوے لولی لنگڑی ہوجائے گی۔

Comments

comments

یہ بھی پڑھیں