اسلام آباد : وزیرداخلہ شیخ رشید نے دعویٰ کیا ہے کہ اپوزیشن کی سیاست 24 سے 30مارچ تک کی ہے، پھر ان کے ساتھ اپریل فول ہوگا۔
تفصیلات کے مطابق وزیرداخلہ شیخ رشید نے اے آر وائی نیوز کے پروگرام باخبرسویرا میں گفتگو کرتے ہوئے کہا اپوزیشن تحریکِ عدم اعتماد لانے میں ناکام ہوگی۔
شیخ رشید کا کہنا تھا کہ پہلے دن سے کہہ رہا ہوں یہ لوگ ہار جائیں گے ، ان کی سیاست چوبیس سے تیس مارچ تک کی ہے، پھر ان کے ساتھ اپریل فول ہوگا۔
انھوں نے مزید کہا کہ ایم کیو ایم کو کئی سال سے جانتا ہوں، ایم کیوایم عمران خان کو ووٹ دے گی اور جو عمران خان کےخلاف ہے لوگ ان کا گھیراؤ کریں گے۔
وفاقی وزیر نے کہا عدم اعتماد پر انتیس یا تیس مارچ یا یکم اپریل کو اجلاس بلایا جاسکتا ہے اب اسپیکر پر منحصر ہے کہ وہ کب اجلاس بلاتے ہیں لیکن اگر کسی نے ہیرا پھیری کی تو ان کی رکنیت بھی اسپیکر ہی ختم کریں گے۔
شیخ رشید کا کہنا تھا کہ قومی اسمبلی کا اجلاس اسپیکر نے 14دن کے اندربلاناہے، اب 172بندے لانا ان کا کام ہےکیا وہ بھی ہم لاکردیں گے۔