اسلام آباد: وزیر داخلہ شیخ رشید نے بھارت پر واضح کردیا ہے کہ جموں ڈرون حملے میں پاکستان کا کوئی کردار نہیں، بھارت کےپاس ثبوت ہےتو سامنے لائے۔
تفصیلات کے مطابق اسلام آباد میں پریس کانفرنس کرتے ہوئے وفاقی وزیر داخلہ شیخ رشید نے کہا کہ میں بھارت وزارتی داخلہ کے بیان کی پر زور مذمت کرتاہوں، جموں میں ہونے والے ڈرون حملے میں پاکستان کا کوئی کردار نہیں، بھارت کے پاس کوئی ثبوت ہے تو سامنے لائے۔
شیخ رشید نے کہا کہ بھارت کرونا پر ناکامی کی وجہ سےپاکستان پر الزام لگارہا ہے، را انڈیا پاکستان کو تسلیم نہیں کرتا، لاہور واقعے میں کچھ اور قوتیں بھی ہیں۔
افغانستان کی صورت حال پر وفاقی وزیر داخلہ کا کہنا تھا کہ دعا ہے کہ افغانستان میں خانہ جنگی کی صورتحال نہ ہو، مفاہمت افغانستان کا مقصدہےکہ پاکستان میں بھی امن ہوگا، پڑوسی ممالک کی افغانستان میں سیاست ہے ایران بھی سیاست کرناچاہےگا، پاکستان افغانستان میں امن کے لئےبھرپورکوششیں کرےگا۔
شیخ رشید کا کہنا تھا کہ ہم امریکا،یورپ سمیت دنیاسےاچھےتعلقات رکھناچاہتےہیں مگر چین کےمسئلےکو اسٹیک پر نہیں رکھنا چاہتے۔
پریس کانفرنس میں شیخ رشید کا کہنا تھا کہ آج تین بجےاہم ترین میٹنگ ہے، جس میں پاکستان کےمستقبل کی سیاست ، سالمیت کی سیاست ہونی جارہی ہے، پاکستان کی سیاست میں بہت بڑا فرق آنےجارہاہے۔
اپوزیشن کو ہدف تنقید بناتے ہوئے وفاقی وزیر داخلہ کا کہنا تھا کہ اپوزیشن جو حکومت گرانےکی باتیں کررہی ہےاب ذہنی طور تسلیم کرچکی کہ مزید دو سال ہیں، شہباز شریف اور مریم نواز بہت دور جاچکے ہیں، ایک شمال اور دوسراجنوب میں ہے،میں کہتا تھا کہ ن سےش نکلےگی تو میرا مذاق اڑاتےتھے۔
ساتھ ہی انہوں نے کہا کہ اپوزیشن سےاچھےتعلقات ہونےچاہئیں، ہمیں الیکشن اصلاحات پر مل کربیٹھناچاہئے، کشمیر الیکشن کےبعد ہم مل کربیٹھیں گے۔
شیخ رشید نے دعویٰ کیا کہ اوورسیز پاکستانیوں کےووٹ کیلئے پورے پاکستان میں اتفاق ہوگا، اوورسیزپاکستانیوں کے70لاکھ سےلیکر ایک کروڑ ووٹ ہونگے، اوورسیز پاکستانی عمران خان کا ووٹرہے، اوورسیزپاکستانی کی سیاست اگلےپانچ سال کیلئےعمران خان کےنام کردےگا۔
شیخ رشید کا کہنا تھا کہ حکومت پروٹیکٹ کرنےکی پوری پالیسی رکھتےہیں، گزشتہ20سال سےدہشت گردی کامقابلہ کررہےہیں اب فوج کےساتھ ساتھ پاکستان کی پولیس بھی بہت ٹرینڈ ہوچکی، جان ہتھیلی پر رکھ کر88فیصد کابل پر فینسنگ کی ،فینسنگ اگلے2ماہ تک100فیصدمکمل ہوجائےگی۔
