لندن : پی ٹی آئی رہنما شیر افضل مروت کا کہنا ہے کہ گرفتاری اور موت کا کوئی خوف نہیں،جان ہتھیلی پر رکھ کر بانی پی ٹی آئی کے مشن پرعمل پیراہیں۔
تفصیلات کے مطابق پاکستان تحریک انصاف کے رہنما شیر افضل مروت نے لندن میں اے آر وائی نیوز سے گفتگو کرتے ہوئے کہا کہ بانی پی ٹی آئی نے ملاقات کے لیے بلایا ہے، پاکستان واپس جارہا ہوں۔
رہنما پی ٹی آئی کا کہنا تھا کہ گرفتاری اورموت کاکوئی خوف نہیں،جان ہتھیلی پر رکھ کر بانی پی ٹی آئی کے مشن پرعمل پیرا ہیں.
فواد چوہدری سے متعلق بیان پر انھوں نے کہا کہ فواد کے بھاگنے کی عکاسی کی تھی ،جھگڑا توکوئی نہیں ، وہ حضرت خود میرے خلاف میڈیا پر بیان دیتے ہیں کس کی کوئی حیثیت نہیں ، فواد اور شیخ رشید ایک ہی راستے کے مسافر ہیں۔
یاد رہے اس سے قبل رکن قومی اسمبلی نے شبلی فراز سے پارٹی آفس اور سینیٹ میں قائد حزب اختلاف دونوں عہدوں سے مستعفی ہونے کا مطالبہ کیا گیا۔
اپنے بیان میں ان کا کہنا تھا کہ میں عمرایوب کی طرف سے سیکرٹری جنرل کا عہدہ چھوڑنے کے فیصلے کا خیر مقدم کرتا ہوں، پارٹی کے اہم عہدوں پر فائز چند دیگر افراد کو بھی ان کی پیروی کرنی چاہیے۔
