اداکار دانش تیمور اور سارہ خان کے نئے ڈرامہ سیریل ’شیر کا او ایس ٹی جاری کردیا گیا۔
ڈرامہ سیریل ’شیر‘ کا او ایس ٹی چند گھنٹوں قبل جاری کیا گیا جس میں سارہ خان کے شوہر و گلوکار فلک شبیر نے اپنی آواز کا جادو جگایا ہے۔
گانے کے بول ’تیرے نال پیار وے‘ ہیں جبکہ اس میں دانش تیمور اور سارہ خان کی محبت دکھائی گئی ہے۔
’شیر‘ کے ہدایت کار ریحان طالش ہیں جبکہ اس کی کہانی زنجابیل عاصم شاہ نے لکھی ہے۔
او ایس ٹی کو یوٹیوب پر ہزاروں کی تعداد میں ناظرین دیکھ چکے ہیں، اور فلک شبیر کی آواز کے ساتھ ساتھ سارہ خان کی خوبصورتی کی تعریف کررہے ہیں۔
ڈرامے کے دیگر کرداروں میں ارجمند رحیم، سنیتا مارشل، نادیہ افگن، منزہ عارف، سلمان شاہد، فیضان شیخ، نبیل ظفر، تقی احمد، عتیقہ اوڈھو، آمنہ ملک، حسان نیازی ودیگر شامل ہیں۔
دانش تیمور اس سے قبل بلاک بسٹر ڈرامے ’کیسی تیری خود غرضی میں اداکاری کے جوہر دکھا چکے ہیں جس میں ان کے ساتھ مرکزی کردار میں درفشاں سلیم موجود تھیں۔
سارہ خان کا شمار پاکستانی ڈرامہ انڈسٹری کی نامور اداکاراؤں میں ہوتا ہے، ان کی بے مثال خوبصورتی اور گلوکار شوہر فلک شبیر کے ساتھ ان کے خوبصورت رشتے کو ان کے مداح بے حد پسند کرتے ہیں اور وہ اب ’شیر‘ کے ساتھ اسکرین پر واپسی کریں گی۔
