شکارپور: کچے کے علاقے میں پولیس نے مقابلے کے بعد دو مغویوں کو بازیاب کرانے کا دعویٰ کیا ہے، مغویان کو آج ہی بس سے اتار کر اغواء کیا گیا تھا۔
تفصیلات کے مطابق خانپور کے قریب انڈس ہائی وے پر آج ڈاکوؤں نے بس میں سوار ٹرک ڈرائیور اور کلینر کو اغوا کیا تھا، پولیس کے مطابق مغوی کی شناخت ڈائیور علی نواز اور کلینر دیدار کےنام سے ہوئی، اطلاع ملتے ہی علاقے کی ناکہ بندی کرکے اغوا کاروں کے قدموں کے نشانات کا تعاقب شروع کردیا گیا۔
ایس ایس پی فیضان علی نے بتایا کہ اس دوران ٹریسنگ کے ذریعے مغویوں کے موبائل نمبرز کی لوکیشن کی جانچ پڑتال بھی کی گئی۔
بعد ازاں شکارپور کے علاقے ناپر کوٹ کے قریب کچے میں پولیس اور ڈاکوؤں میں مقابلہ ہوا، مقابلے کے بعد ان دونوں مغویوں کو بازیاب کرالیا گیا،
ایس ایس پی فیضان علی نے بتایا کہ ڈاکو مغویوں کو ایک جگہ سے دوسری جگہ منتقل کررہے تھے، خفیہ اطلاع پر کارروائی کی گئی تو ڈاکو فرار ہوگئے۔
مسافر وین الٹنے سے ایک شخص جاں بحق 15افراد زخمی
علاوہ ازیں شکارپور لاڑکانہ روڈ قومی شاہراہ پر مسافر وین بےقابو ہوکر الٹ گئی، جس کے نتیجے میں ایک شخص جاں بحق اور15افراد زخمی ہوگئے، زخمیوں میں5افراد کو تشویشناک حالت میں لاڑکانہ اسپتال منتقل کیا گیا۔
