اسلام آباد: وفاقی وزیر برائے انسانی حقوق شیریں مزاری نے اقوام متحدہ کے ہائی کمشنر برائے انسانی حقوق کو خط لکھا ہے جس میں انہوں نے کہا کہ بھارت کا 5 اگست 2019 کا اقدام غیر قانونی ہے۔
تفصیلات کے مطابق شیریں مزاری نے اقوام متحدہ کے ہائی کمشنر برائے انسانی حقوق کو خط لکھا ہے جس میں انہوں نے مقبوضہ کشمیر کی آبادی کا تناسب بدلنے کے عمل کو رکوانے کا مطالبہ کیا ہے۔
خط میں کہا گیا ہے کہ بھارت کا 5 اگست 2019 کا اقدام غیر قانونی ہے،انسانی حقوق کا ادارہ بھارتی اقدام غیر قانونی قرار دے چکا ہے، اقوام متحدہ کا ادارہ مقبوضہ کشمیر پر 2رپورٹس جاری کرچکا ہے۔
وفاقی وزیر کی جانب سے لکھے گئے خط میں مقبوضہ کشمیر کو بھارت میں ضم کرنے کے اقدام پر گہری تشویش کا اظہار کیا گیا ہے۔ خط میں کہا گیا ہے کہ جنیوا کنونشن کے خلاف بھارت نے 25 ہزار غیر کشمیریوں کو ڈومیسائل دیے۔
خط کے متن میں کہا گیا ہے کہ سوپور میں 3 سال کے بچے کی حالیہ تصویر بھارتی بربریت کی عکاس ہے۔
