قومی ٹیم کے سابق فاسٹ بولر شعیب اختر نے پاکستان کے خلاف ویرات کوہلی کی یادگار اننگز کی تعریف کی اور ساتھ ہی انہیں ٹی 20 سے ریٹائرمنٹ لینے کا مشورہ دے دیا۔
سابق اسپیڈ اسٹار شعیب اختر نے اپنے یوٹیوب چینل پر کہا کہ میں چاہتا ہوں کہ ویرات کوہلی ٹی 20 انٹرنیشنل سے ریٹائرمنٹ لیں اور اس کے بعد وہ ون ڈے کرکٹ میں مزید سنچریاں اسکور کرسکتے ہیں۔
شعیب اختر نے کہا کہ ویرات کوہلی نے پاکستان کے خلاف اپنی زندگی کی سب سے بڑی اننگز کھیلی ہے۔
ان کا کہنا تھا کہ جب آپ کی پرفارمنس اچھی نہیں ہوتی تو اعتماد کو بحال کرنا پڑتا ہے اور جب اعتماد مضبوط ہوتا ہے تو کارکردگی میں بھی نکھار آجاتا ہے۔
سابق اسپیڈ اسٹار کا کہنا تھا کہ ورلڈ کپ اسی وقت شروع ہوتا ہے جب بھارت اور پاکستان کھیلیں گے اور دونوں ٹیمیں ایک بار پھر آمنے سامنے ہوں گی۔
46 ٹیسٹ اور 163 ون ڈے کھیلنے والے شعیب اختر نے بھارت کے خلاف قومی ٹیم کی کارکردگی کو بھی سراہا۔
