The news is by your side.

Advertisement

خاتون سے پیزا چھیننے کی دل دہلا دینے والی واردات، ویڈیو دیکھیں

ایریزونا: ایک امریکی ریاست میں خاتون سے پیزا چھیننے کی ایک ایسی ویڈیو سامنے آئی ہے جسے دیکھ کر دل دہل جاتا ہے۔

غیر ملکی میڈیا کے مطابق امریکی ریاست ایریزونا کے علاقے ٹسکان میں ایک چور 77 سالہ خاتون کے سر پر لوہے کا پائپ مار کر ان سے پیزا چھین کر بھاگ گیا۔

واردات کی دل دہلا دینے والی ویڈیو فوٹیج سامنے آنے پر معلوم ہوا کہ خاتون پیزا خرید کر ریسٹورنٹ سے نکل رہی تھیں، جیسے ہی وہ شیشے کا دروازہ کھول کر باہر نکلیں، لوہے کا پائپ لیے چور نے حملہ کر دیا۔

یہ واقعہ 21 اپریل کو پیش آیا تھا، ٹسکان پولیس ڈیپارٹمنٹ نے واقعے کی سی سی ٹی وی فوٹیج اب ٹویٹر پر ریلیز کرتے ہوئے عوام سے درخواست کی ہے کہ مشتبہ شخص کی نشان دہی میں مدد کی جائے۔

ویڈیو میں دیکھا جا سکتا ہے کہ خاتون پیزا لے کر ریسٹورنٹ سے باہر نکلنے لگیں تو چور اچانک اس طرح آگے بڑھا جیسے خاتون کے لیے دروازہ کھول رہا ہو، اور پھر جیسے ہی وہ باہر نکلیں، چور نے اس کے سر پر لوہے کا پائپ دے مارا، اور پیزا چھین کر بھاگ گیا۔

اس واقعے کے بعد مذکورہ پیزا چَین کی دس لوکیشنز پر سیکورٹی بڑھا دی گئی، پولیس نے حملہ آور کے حلیے کے بارے میں بتایا کہ وہ سیاہ فام ہے اور ریسٹورنٹ پر باقاعدہ سے آتا رہا ہے، اس پر ہسپانوی ہونے کا شبہ ہے، قد اندازاً 5 فٹ اور 6 انچ ہے۔

خاتون کے بارے میں پولیس اور ریسٹورنٹ نمایندے کا کہنا تھا کہ وہ ٹھیک ہے۔

Comments

یہ بھی پڑھیں