اسلام آباد : وفاقی وزیر اسد عمر نے این سی او سی اجلاس کی صدارت کرتے ہوئے کہا کہ دکاندار بغیر ماسک والے گاہک سے لین دین نہ کرنے کی پالیسی اپنائیں۔
تفصیلات کے مطابق وفاقی وزیر اسد عمر کی زیر صدارت نیشنل کمانڈ اینڈ آپریشن سینٹر کا اجلاس منعقد ہوا جس میں وفاقی وزرافخر امام، اعجاز شاہ، خسرو بختیار، وزیراعظم کے معاونین خصوصی ڈاکٹر ظفر مرزا، معید یوسف بھی شریک ہوئے۔
اجلاس کے دوران متعلقہ حکام نے این سی او سی کو کرونا ایس او پیز پر عملدر آمد سے متعلق بریفنگ دی، اس موقع پر اسد عمر کا کہنا تھا کہ حکومت کرونا ایس او پیز پر عملدر آمد کیلئے تاجر تنظیموں سے مدد لے گی۔
ان کا کہنا تھا کہ ایس او پیز پر عملدر آمد، نرمی کے بارے میں جامع پالیسی مرتب کی جائے فی الحال دکاندار بغیر ماسک والے گاہک سے لین دین نہ کرنے کی پالیسی اپنائیں۔
اسد عمر نے کہا کہ این سی او سی قلیل و طویل المدت پالیسیاں وضع کر رہی ہے، متعلقہ ادارے کرونا وائرس سے متعلق عوامی شعور اجاگر کریں، عوام کو کرونا کے خلاف جنگ میں حکومتی اقدامات سے آگاہ کیا جائے۔
انہوں نے کہا کہ شہریوں کی حفاظت یقینی بنانا حکومت کی اولین ترجیح ہے، ملک میں یکم جون سے ریسورس مینجمنٹ سسٹم کا نفاذ ہوگا اور آر ایم ایس سے عوام کو اسپتالوں سے متعلق تازہ معلومات دستیاب ہوں گی۔
این سی او سی نے اسپتالوں میں وینٹی لیٹر کی دستیابی پر اطمینان کا اظہار کرتے ہوئے ایس او پیز کی خلاف ورزی پر سخت کارروائی کی سفارش کی۔
