کراچی : کورنگی انڈسٹریل ایریا پولیس نے کازوے پر کارروائی کرتے ہوئے ایس ایچ او کے قتل سمیت متعدد سنگین وارداتوں میں ملوث ملزم کو گرفتار کرلیا۔
اس حوالے سے پولیس ذرائع کا بتانا ہے کہ ای بی ایم کازوے کورنگی پر کی جانے والی کارروائی میں سابق ایس ایچ او رحیم خان کی شہادت میں ملوث ملزم کو گرفتار کرلیا گیا ہے۔
ذرائع کے مطابق گرفتار ملزم سے ہینڈ گرینیڈ اور30بور کا پستول برآمد ہوا ہے، ملزم کیخلاف مقدمہ درج کرکے مزید تحقیقات کا آغاز کردیا گیا ہے۔
پولیس حکام کا کہنا ہے کہ ملزم ساتھیوں کے ساتھ مل کر نئے ماڈل کی گاڑیاں بھی چھینتا تھا چھینی گئی گاڑیاں اندرون سندھ منتقل کی جاتی تھیں۔
ملزمان نے25ستمبر2020کو فیروزآباد کے علاقے سے ایک کار چھینی اس دوران ملزمان کا پولیس کے ساتھ مقابلہ ہوا تھا جس میں ایس ایچ او رحیم خان شہید ہوئے تھے۔
پولیس کے مطابق ملزمان کا ایک ساتھی واحد بخش 19 مارچ کو شارع فیصل مقابلے میں مارا گیا تھا، ملزمان نے اپنے ساتھی کی ہلاکت پر مخبری کے شبےمیں 2افراد کو قتل کردیا تھا۔
ذرائع نے مزید بتایا کہ گلستان جوہر میں جعفرحسین اور اس کی اہلیہ کو گھر میں گھس کر بےدردی سے قتل کیا گیا تھا۔
