لاہور : پاکستان کی شوبز انڈسٹری والوں پر بھی الیکشن فیور چڑھ گیا، گلوکار ابرالحق اور جواد احمد انتخابات لڑنے اکھاڑے میں اتر گئے جبکہ پی پی نے کراچی سے تین اداکار میدان میں اتارے۔
تفصیلات کے مطابق 2018 کے انتخابات میں شوبز والے بھی سیاسی میدان میں کود پڑے، گلوکار ابرار الحق کو پاکستان تحریک انصاف کی جانب سے نارووال سے قومی اسمبلی کا ٹکٹ دیا ہے، معروف گلوکار این اے اٹھتر پر ن لیگ کے احسن اقبال سے مقابلہ کریں گے۔
گلوکار جواد احمد تو وزارت عظمیٰ کے تین امیدواروں سے ٹکرا رہے ہیں، برابری پارٹی کے ٹکٹ پر لاہور کے این اے اور 131 اور 132 پرعمران خان اور شہباز شریف جبکہ کراچی کے این 146 پر بلاول کا مقابلہ کریں گے۔
کراچی میں پیپلز پارٹی نے بھی تین اداکاروں کو ٹکٹ دے دیا، این اے 256سے ساجد حسن ، پی ایس 101 سے ایوب کھوسو اور پی ایس 94 سے گل رعنا تیر کے نشان پر انتخاب لڑیں گے۔
یاد رہے اس سے قبل بھی معروف اداکار قوی خان ، کنول نعمان ، طارق عزیز ، عنایت حسین بھٹی اور مصطفیٰ قریشی بھی عام انتخابات میں حصہ لے چکے ہیں۔
واضح رہے کہ ملک میں 25 جولائی کو عام انتخابات ہوں گے۔
