کسی بھی کام کیلئے وقت کی پابندی بہت اہمیت کی حامل ہوتی ہے، چاہے وہ دفتر آنا ہو، اسکول پہنچنا ہو، دکان ہو یا کسی تقریب میں جانا ہو۔
وقت کی پابندی کا خیال رکھنا ہر ایک کے لئے فطری عمل نہیں ہے، پابندی کرنے والے لوگ معاشرے میں اپنا علیحدہ مقام رکھتے ہیں اور لوگ ان کے اس عمل کی پیٹھ پیچھے بھی تعریف کرتے ہیں۔
اپنے کام میں وقت کی پابندی کی اہمیت کے حوالے سے اے آر وائی ڈیجیٹل کے پروگرام گڈ مارننگ پاکستان میں ماضی اور حال کے ٹی وی اور فلم کے نامور اداکاروں نے اپنے تجربات اور واقعات ناظرین سے شیئر کیے۔
ماضی کی فلموں میں اپنی صلاحیتوں کے جوہر دکھانے والی اداکارہ نشو نے کہا کہ جب ہم سیٹ پر جایا کرتے تھے تو ٹائم کا بہت خیال رکھتے تھے، کام اتنا تھا کہ سونے کا ٹائم ہی نہیں ملتا تھا۔
انہوں نے اپنے بارے میں بتایا کہ ایک فلم کی شوٹنگ سے رات دو ڈھائی بجے گھر پہنچ کر پھر دو گھنٹے بعد 5سے سات بجے والی دوسری شوٹنگ میں پہنچنا ہوتا تھا جسے میں پوری ایمانداری سے کرلیا کرتی تھی۔
اداکارہ نشو نے کہا کہ ایک بار میں 15 منٹ دیر سے پہنچی تو اداکار مرحوم محمد علی اسٹوڈیو میں ٹہل رہے تھے مجھے دیکھتے ہی انہوں نے کہا کہ اگر تم اپنی کامیابی کا تسلسل چاہتی ہو تو وقت کی پابندی کا لازمی خیال رکھنا۔
اس موقع پر اداکار جاوید شیخ نے کہا کہ میں نےکبھی اپنے کام میں سستی کا مظاہرہ نہیں کیا بلکہ سیٹ پر مقررہ وقت پر پہنچ جاتا ہوں، ان کا کہنا تھا کہ میں اکثر اپنے جونئیرز کو بھی یہی کہتا ہوں کہ ہر کام میں وقت کی پابندی کا ضرور خیال رکھیں۔
ٹی وی اداکار اسامہ کا کہنا تھا کہ لڑکیاں سیٹ پر پہنچنے میں زیادہ ٹائم لگاتی ہیں کیونکہ انہیں میک اپ بھی کرنا ہوتا ہے لیکن اس کے برعکس لڑکے دس 15منٹ سے زیادہ لیٹ نہیں ہوتے۔
