اسلام آباد: ایف آئی اے میں بڑے پیمانے پر افسران کے کرپشن اور اختیارات سے تجاوز کا کیس سامنے آ گیا ہے، جس سے شہریوں کو غیر قانونی طور پر کیسز میں پھنسانے کا انکشاف ہوا ہے۔
تفصیلات کے مطابق ایف آئی اے کے 36 تفتیشی افسران کو اختیارات سے تجاوز پر شوکاز نوٹسز جاری کیے گئے ہیں، شوکاز کا سامنا کرنے والے افسران میں ایس آئی، اے ایس آئی، ہیڈ کانسٹیبل شامل ہیں، یہ تفتیشی افسران اسلام آباد زون سمیت ایئرپورٹ پر تعینات تھے۔
شو کار نوٹیفکیشن کے مطابق مذکورہ افسران پر محکمانہ کرپشن، نااہلی، ریکارڈ میں رد و بدل اور غفلت کا الزام ثابت ہو چکا ہے، اور شوکاز نوٹس میں کہا گیا ہے کہ الزامات ثابت ہو چکے ہیں جس کی سزا نوکری سے برطرفی بنتی ہے۔
کرپٹ افسران کے خلاف ڈائریکٹر ایف آئی اے اسلام آباد کو مجاز اتھارٹی مقرر کیا گیا تھا، مجاز اتھارٹی نے سروس رول 2020 کے تحت الزامات کو درست پایا اور کارروائی کی۔
نوٹس کے مطابق تفتیشی افسران شہریوں کو جعلی نوٹس بھجوا کر بلیک میلنگ میں ملوث پائے گئے ہیں، متعدد تفتیشی افسران اہم نوعیت کے کیسز کی ریکارڈ ٹیمپرنگ میں بھی ملوث پائے گئے۔
کرپٹ افسران کے خلاف محکمانہ کارروائی کا آغاز شہریوں کی درخواست پر کیا گیا۔
