ممبئی: آنجہانی پنجابی گلوکار شبھ دیپ سنگھ المعروف سدھو موسے والا کے والد بلکور سنگھ نے نومولود بیٹے کا نام بتادیا۔
بھارتی میڈیا رپورٹس کے مطابق سدھو موسے والا کے والد بلکور سنگھ سے جب نومولود کے نام کے بارے میں پوچھا گیا تو انہوں نے کہا کہ ’یہ میرے لیے ’شبھ دیپ‘ ہی ہے، اس کا چہرہ اور نین نقش بھی شبھ دیپ جیسے ہی ہیں۔
واضح رہے کہ گلوکار سدھو موسے والا کو 29 مئی 2022 میں ضلع مانسا کے گاؤں جواہر میں نامعلوم حملہ آوروں کی جانب سے فائرنگ کر کے قتل کر دیا گیا تھا اور اس وقت ان کی عمر 28 سال تھی۔
سدھو موسے والا کے والد بلکور سنگھ نے بذریعہ سوشل میڈیا ننھےمہمان کی آمد کا اعلان کیا تو ایک جانب صارفین نے انہیں مبارک باد پیش کی تو بعض صارفین نے کہا ’سدھو موسے والا لوٹ آیا ہے‘۔
View this post on Instagram
سدھو موسے والا کے والد بلکور سنگھ نے گزشتہ روز فوٹو اینڈ ویڈیو شیئرنگ پلیٹ فارم انسٹاگرام پر ننھے مہمان اور آنجہانی گلوکار کی تصویر کے ساتھ نئی تصویر شیئر کی۔
مذکورہ پوسٹ پر تبصرہ کرتے ہوئے سوشل میڈیا صارفین کی بڑی تعداد نے آنجہانی گلوکار کے والدین کو ننھے مہمان کی آمد پر مبارک باد دی۔
بیشتر مداحوں نے تبصرہ کرتے ہوئے کہا کہ ’کنگ لوٹ آیا ہے‘، ’ سدھو واپس آگیا ہے‘، ’لیجنڈ کبھی مرتا نہیں‘ بعض صارفین نے ننھے مہمان کے لیے دعا بھی کی کہ اسے صحت و تندرستی والی زندگی ملے۔
