قومی بلے باز سدرہ امین کو انٹرنیشنل کرکٹ کونسل (آئی سی سی) نے ویمنز پلیئر آف دی منتھ قرار دے دیا۔
تفصیلات کے مطابق قومی ٹیم کی بہترین بیٹسمین سدرہ امین کو آئی سی سی کا اعزاز حاصل ہوا ہے، کرکٹ کونسل نے سدرہ امین کو نومبر میں شان دار کارکردگی دکھانے پر آئی سی سی پلیئر آف دی منتھ کے اعزاز سے نواز دیا۔
پاکستانی اوپنر سدرہ نے آئرلینڈ کے خلاف سیریز میں 277 رنز اسکور کیے تھے، انھوں نے سیریز میں 176 رنز کی ناقابل شکست اننگز بھی کھیلی۔
سدرہ امین نے اس سیریز میں 150 سے زائد رنز کی اننگز کھیلنے والی پہلی پاکستانی خاتون کھلاڑی ہونے کا بھی اعزاز اپنے نام کیا، سدرہ نے منیبہ کے ساتھ 221 رنز کی ریکارڈ اوپننگ شراکت بھی بنائی تھی۔
A truly special innings from @SidraAmin31 ✨
5️⃣th highest individual score in Women’s ODIs 🙌#PAKWvIREW | #BackOurGirls pic.twitter.com/SkueoJw9tL
— Pakistan Cricket (@TheRealPCB) November 4, 2022
سدرہ امین آئی سی سی خواتین کی ون ڈے بیٹنگ رینکنگ میں بھی 22 ویں نمبر پر آگئی ہیں، اور اس فہرست میں وہ سب سے زیادہ رینک والی پاکستانی بلے باز ہیں۔
سدرہ امین نے ایوارڈ ملنے پر خوشی کا اظہار کرتے ہوئے کہا کہ میں یہ ایوارڈ جیت کر بہت اچھا محسوس کر رہی ہوں۔
