سائنسدان تو مریخ پر زندگی کے آثار ڈھونڈنے کی تگ ودو میں ہیں لیکن ہمارے نظام شمسی سے بہت دور ایک سیارے میں زندگی کے آثار مل گئے ہیں۔
سائنسدان زمین سے باہر زندگی کے آثار تلاش کرنے کی جستجو میں ہیں۔ اس حوالے سے اب تک مریخ ان کا اہم ہدف رہا ہے تاہم اب اطلاعات کے مطابق سائنسدانوں کو زندگی کے آثار مل گئے ہیں تاہم یہ آثار ہمارے نظام شمسی سے بہت دور ایک اجنبی سیارے میں ملے ہیں۔
غیر ملکی میڈیا کے مطابق سائنسدانوں کی ایک ٹیم نے دعویٰ کیا ہے کہ انہیں ایک اجنبی سیارے پر زندگی کے بارے میں مضبوط اشارہ ملا ہے۔تاہم یہ سیارہ ہمارے نظام شمسی سے باہر ہے اور اس کا سائنسی نام K2-18b ہے۔
رپورٹ کے مطابق یہ سیارہ ہماری زمین سے 120 نوری سال کے فاصلے پر موجود ایک ستارے کے گرد گردش میں ہے۔
محققین نے جب اس سیارے K2-18b کا جیمز ویب اسپیس ٹیلی اسکوپ کا استعمال کرتے ہوئے جائزہ لیا تو اس کے ماحول میں 2 گیسوں- ڈائمتھائل سلفائیڈ، یا ڈی ایم ایس اور ڈائمتھائل ڈسلفائیڈ، یا ڈی ایم ڈی ایس کا پتا لگا۔
مذکورہ دونوں گیسیں زمین پر بنیادی طور پر مائیکروبیل حیات جیسے سمندری فائٹو پلانکٹن جیسے جاندار عناصر سے پیدا ہوتی ہیں۔
اس دریافت کے بعد محققین نے ایک پریس کانفرنس کرتے ہوئے کہا کہ مذکورہ سیارے پر دو گیسوں کا ہونا اس بات کا اشارہ ہے کہ وہاں زندگی ہو سکتی ہے، تاہم یہ حتمی نہیں بلکہ اس حوالے سے مزید مشاہدات کی ضرورت ہے۔
یہ تحقیق کیمبرج یونیورسٹی کے فلکیاتی طبیعیات دان اور ایسٹرو فزیکل جرنل لیٹرز میں شائع ہوئی اور اس تحقیق کے سربراہ مصنف نکو مدھوسودھن کا کہنا تھا کہ نظام شمسی سے باہر زندگی کی تلاش میں تبدیلی کا لمحہ ہے جہاں ہم نے یہ ثابت کیا ہے کہ موجودہ سہولیات کے ساتھ ممکنہ طور پر قابل رہائش سیاروں میں حیاتیاتی نشانات کا پتا لگانا ممکن ہے، ہم فلکیات کے مشاہداتی دور میں داخل ہو چکے ہیں۔
