سکھوں کی عالمی تنظیم سکھ فار جسٹس (ایس ایف جے) نے مساجد پر بھارتی حملوں میں شہید پاکستانیوں کے خاندانوں کیلیے 35 لاکھ روپے امداد کا اعلان کر دیا۔
رہنما سکھ فار جسٹس گرپتونت سنگھ پنوں نے اپنے بیان میں کہا کہ ایس ایف جے بھارت کو معاشی طور پر تباہ کرے گا، جب تک سکھ بھارت کی ریاست کو پارہ پارہ نہیں کر دیتے جنگ جاری رکھیں گے۔
پاک بھارت کشیدگی سے متعلق تمام خبریں
گرپتونت سنگھ پنوں نے کہا کہ نریندر مودی کی بھارتی فوج نے پاکستان میں مساجد پر میزائل حملے کیے اور کھلے عام اسلام کے خلاف جنگ کا اعلان کر کے پاکستان سے جنگ شروع کی۔
یہ بھی پڑھیں: بھارتی فوج کو پنجاب سے گزر کر پاکستان پر حملہ نہیں کرنے دیں گے، گرپتونت سنگھ پنوں
انہوں نے کہا کہ خالصتان کے حامی سکھ پاکستان کے شہیدوں کے ساتھ کندھے سے کندھا ملا کر کھڑے ہیں، مساجد اور ننکانہ صاحب پر بھارتی حملے پاک فوج نے ناکام بنائے، نریندر مودی نے مسلمانوں اور سکھوں کے خلاف جنگ کا اعلان کیا ہے جس کی قیمت ادا کرنی پڑے گی۔
ان کا کہنا تھا کہ ممبئی اسٹاک ایکسچینج کو گرا کر بھارتی معیشت کو مفلوج کریں گے جو ان کی فوج کو فنڈز فراہم کرتی ہے۔
30 اپریل 2025 کو گرپتونت سنگھ پنوں نے اپنے بیان میں کہا تھا کہ بھارت پاکستان پر حملہ کرتا ہے تو یہ بھارت اور نریندر مودی کی آخری جنگ ہوگی۔
ان کا کہنا تھا کہ پنجاب بھارتی تسلط سے آزاد ہوگا اور نیا ملک بنے گا، پنجاب پاکستان کے ساتھ ریڑھ کی ہڈی بن کر کھڑا ہے، پاکستان اقوام متحدہ میں خالصتان ریفرنڈم کی تحریک ڈالے۔
رہنما تحریک خالصتان نے مزید کہا تھا کہ پاک آرمی کیلیے بھارتی پنجاب میں لنگر لگائیں گے، بھارتی فوج کا ہم مقابلہ کریں گے، بھارتی پنجاب کینٹ ایریا میں وال چاکنگ ہو رہی ہے سکھ پاکستان کے خلاف مت لڑیں۔
