کراچی : سندھ پبلک سروس کمیشن سے کامیاب ہونے والے 74 افسران کو تقرر نامے جاری کردیئے گئے ، افسران میں 57 مرد اور 17 خواتین افسران شامل ہیں۔

تفصیلات کے مطابق مشیرِ زراعت سندھ منظور حسین وسان نے سندھ پبلک سروس کمیشن سے کامیاب ہونے والے 74 ایگری کلچر افسران کو تقرر نامے جاری کردیئے، 74 ایگری کلچر افسران میں 57 مرد اور 17 خواتین افسران شامل ہیں۔

محکمۂ زراعت میں 17 گریڈ کے افسران سندھ پبلک سروس کمیشن سے منتخب ہوئے تھے، میڈیکل اور ویری فیکیشن کے بعد آج 74 کامیاب افسران کو محکمۂ زراعت سندھ کے دفتر میں ایک سادہ تقریب میں تقرر نامے دیئے گئے۔

اس موقع پر مشیرزراعت منظور وسان نے کہا کہ پیپلز پارٹی کا منشور روزگار دینا ہے روزگار چھیننا نہیں، ہم لوگوں کو صلاحیتوں کے اظہار کا پورا موقع دینا چاہتے ہیں، کراچی اور سندھ کے دیگر شہروں سے ایگری کلچر افسران منتخب ہوئے۔

منظور حسین وسان کا کہنا تھا کہ اعلیٰ تعلیم اور بہترین اہلیت کے ساتھ پبلک سروس کمیشن سے منتخب ہونے والے نوجوان افسران محنت سے کام کریں۔