The news is by your side.

Advertisement

سندھ کابینہ نے کیماڑی ضلع بنانے کی منظوری دے دی

کراچی: وزیراعلیٰ سندھ کے زیرصدارت اجلاس میں سندھ کابینہ نے کیماڑی ضلع بنانے کی منظوری دے دی۔

تفصیلات کے مطابق وزیراعلیٰ سندھ مراد علی شاہ کی زیرصدارت صوبائی کابینہ کا اجلاس ہوا جس میں صوبائی وزرا، مشیر، چیف سیکریٹری،متعلقہ سیکریٹریز نے شرکت کی۔

اجلاس میں سندھ ٹرسٹ ایکٹ 2020 منظور کر لیا گیا، سندھ ٹرسٹ ایکٹ کو ایف اے ٹی ایف کے مطابق بنایاگیا ہے۔کابینہ کو بتایا گیا کہ قانون میں منی لانڈرنگ کو روکنے کے اقدامات کیےگئے ہیں۔

صوبائی کابینہ نے اجلاس میں کیماڑی ضلع بنانے کی منظوری دے دی۔کیماڑی ضلع میں سائٹ، بلدیہ،ہاربر اور ماڑی پور کو شامل کرنے کی تجویز پر غور کیا گیا۔

سندھ کابینہ کو بریفنگ کے دوران بتایا گیا کہ اس وقت غربی میں 7 سب ڈویژنز منگھوپیر،سائٹ ،بلدیہ ،اورنگی،مومن آباد،ہاربر اور ماڑی پور شامل ہیں،آبادی کے حساب سے ضلع غربی پورے سندھ میں بڑا ضلع ہے۔

اجلاس میں کچھ وزرا نے خیرپور کو بھی 2 ڈسٹرکٹ میں تقسیم کرنے کی تجویز دی۔صوبائی کابینہ کے اجلاس میں ضلع جنوبی کو ڈسٹرکٹ کراچی کا نام دینے کی تجویز کے ساتھ شہر قائد کے اضلاع کو وہاں کے مشہور علاقوں کے نام دیے جانے کی بھی تجویز دی گئی۔

وزیراعلیٰ سندھ مراد علی شاہ نے اجلاس سے خطاب کے دوران کہا کہ 28 اگست کو لوکل گورنمنٹ کی مدت ختم ہو رہی ہے،یہ سندھ حکومت کی جمہوریت پسندی ہے۔

انہوں نے کہا کہ باقی کسی صوبے میں لوکل گورنمنٹ اپنی مدت پوری نہیں کرسکی،ہم نے میئر کراچی کو جیل سے کام کرنے دیا اور تعاون کیا۔

مراد علی شاہ کا کہنا تھا کہ جمہوری پارٹی ہیں،جمہوریت کی مضبوطی کے لیے کام کرتے رہیں گے۔کابینہ نے وزیر اعلیٰ سندھ کو لوکل باڈیز کو مدت پوری کرنے پر مبارکباد دی۔

Comments

یہ بھی پڑھیں