کراچی: شہر قائد میں آتش زدگی سے متاثرہ مارکیٹوں کے متاثرین کے لیے سندھ کابینہ نے معاوضے کی منظوری دے دی۔
تفصیلات کے مطابق سندھ کابینہ نے کراچی میں واقع مشہور مارکیٹوں کوآپریٹو مارکیٹ اور وکٹوریہ مارکیٹ کے متاثرین کو معاوضہ دینے کی منظوری دے دی ہے۔
ترجمان وزیر اعلیٰ کے مطابق کراچی کی ان مارکیٹوں میں 14 نومبر 2021 کو آگ لگی تھی، جس سے 280 دکانیں جل کر راکھ ہوگئی تھیں، جن کے متاثرین کو مالی طور پر بحالی کے لیے سعید غنی کے مطابق سندھ کابینہ نے 91 کروڑ 52 لاکھ 30 ہزار فنڈ کی منظوری دی۔
متاثرین کو معاوضوں کی ادائیگی کے لیے ایک کمیٹی بھی تشکیل دی گئی ہے، جو مکمل تصدیقی عمل کے ساتھ نقصانات کا تعین کرے گی، نقصانات کا تخمینہ لگانے کے بعد متاثرین کو کراس چیک سے ادائیگی کی جائے گی، واضح رہے کہ متاثرین کو کراچی ایفکٹ مارکیٹس ریلیف فنڈ سے ادائیگی کی جا رہی ہے۔
اس اعلیٰ سطحی کمیٹی کا چیئرمین محکمہ امداد باہمی کا صوبائی وزیر ہوگا، اس کے ممبران میں زبیر موتی والا، کمشنر کراچی، سیکریٹری خزانہ، سیکریٹری کوآپریٹو، صدر چیمبر آف کامرس اینڈ انڈسٹریز شامل ہوں گے، کمیٹی میں چیمبر آف کامرس اینڈ انڈسٹریز کراچی کے 2 ممبران، متاثرہ مارکیٹ کے نمائندوں کو بھی شامل کیا جائے گا۔
یاد رہے کہ 30 جنوری کو صدر میں واقع کوآپریٹو مارکیٹ کی بحالی کا باقاعدہ افتتاح کیا گیا تھا، تحریک انصاف کے اراکین اسمبلی نے اپنے فنڈ سے وزیر اعظم عمران خان کی ہدایت پر آتش زدگی سے تباہ مارکیٹ اپنی اصل حالت میں بحال کرنے میں مدد کی تھی۔
کوآپریٹو مارکیٹ: پی ٹی آئی اراکین اسمبلی کے فنڈ سے تاجر پھر سے پیروں پر کھڑے ہو گئے
تاجروں کے مطابق گزشتہ برس نومبر میں کوآپریٹو مارکیٹ میں لگنے والی آگ سے 500 دکانیں جل کر خاکستر ہو گئی تھیں۔ وزیر اعظم عمران خان کی ہدایت پر پی ٹی آئی کراچی کے نمائندوں نے مارکیٹ کی تعمیر نو کا بیڑا اٹھایا اور ڈھائی ماہ کی مختصر مدت میں کام مکمل کیا۔
