کراچی: سندھ حکومت نے 27 دسمبر کو شہید محترمہ بے نظیر بھٹو کی برسی پر عام تعطیل کا اعلان کردیا۔
تفصیلات کے مطابق سندھ حکومت کی جانب سے شہید بینظیر بھٹو کی برسی پر 27 دسمبر کو عام تعطیل کا نوٹیفکیشن بھی جاری کردیا گیا ہے۔
نوٹیفکیشن کے مطابق 27 دسمبر کو شہید بے نظیر بھٹو کی برسی پر صوبے بھر میں عام تعطیل ہوگی، سرکاری، نجی ادارے، لوکل کاؤنسلز اور صوبائی حکومت کے انتظامی دفاتر بند رہیں گے۔
اس سے قبل سندھ حکومت نے شہید محترمہ بینظیر بھٹو کی 17ویں برسی کے موقع پر وفاقی حکومت سے ہیلی کاپٹر طلب کیا ہے۔
محکمہ داخلہ سندھ نے وفاقی وزارت داخلہ کو لکھے گئے خط میں ہیلی کاپٹر دینے کی درخواست کی ہے، برسی کے موقع پر گڑھی خدابخش میں فضائی نگرانی کے لئے وفاقی وزارت داخلہ سے ہیلی کاپٹر طلب کیاگیا ہے۔
یاد رہے کہ 27 دسمبر 2007 کو پاکستان پیپلز پارٹی (پی پی پی) کی سربراہ اور سابق وزیراعظم بینظیر بھٹو کو راولپنڈی کے لیاقت باغ میں جلسے کے بعد خود کش حملہ اور فائرنگ کرکے قتل کر دیا گیا تھا، اس حملے میں ان کے علاوہ مزید 20 افراد جاں بحق ہوئے تھے۔
