کراچی : حکومت سندھ نے طویل مدت تک عدالتوں میں چلنے والے جائیداد کی جانشینی کے مقدمات سے متعلق اہم فیصلہ کرتے ہوئے نئے قانون کی منظوری دے دی ہے جس کے بعد قانونی ورثا کو عدالتوں کے چکر کاٹنا نہیں پڑیں گے۔
تفصیلات کے مطابق وزیر اعلیٰ سندھ کے مشیر برائے قانون اور ترجمان سندھ حکومت مرتضیٰ وہاب نے کہا ہے کہ سندھ حکومت کی اسٹینڈنگ کمیٹی نے جانشینی کے نئے قانون کی منظوری دے دی ہے، جس سے شہریوں کو انصاف کے حصول میں آسانی میسر ہوگی۔
مرتضیٰ وہاب نے کراچی میں میڈیا سے گفتگو کرتے ہوئے کہا کہ کسی شخص کے انتقال کے بعد اس کی جائیداد کی جانشینی کے مسائل پیدا ہوتے ہیں، جنہیں باآسانی حل کرنے کیلئے قائمہ کمیٹی برائے قانون کی جانب سے قانون کی منظوری دی گئی جس کی بہت خوشی ہوئی۔
ترجمان سندھ حکومت کا مزید کہنا تھا کہ قانونی ورثا کو نادرا سے ہی سکسیشن سرٹیفکیٹ اور انتظامی خطوط ملیں گے، پہلے کی طرح قانونی ورثا کو اب عدالت نہیں جانا پڑے گا۔
واضح رہے کہ اس بات میں اختلاف نہیں کہ عدالتوں میں لاکھوں مقدمات کی سماعت ہوتی ہے اور ان کی غیر ضروری طوالت سے بچنے کیلئے بڑے ٹھوس اقدامات کرنے کی ضرورت ہے تاکہ دنیا کے کئی دیگر ملکوں کی طرح پاکستان میں بھی انصاف کی جلد فراہمی کو یقینی بنایا جا سکے۔
