کراچی: گورنر سندھ عمران اسماعیل کا کرونا وائرس کا ٹیسٹ مثبت آگیا۔
اے آر وائی نیوز کی رپورٹ کے مطابق گورنر سندھ عمران اسماعیل کا کرونا ٹیسٹ مثبت آگیا جس کے بعد انہوں نے خود کو قرنطینہ کرلیا۔
گورنر سندھ عمران اسماعیل نے کہا کہ کل میری والدہ آئی تھیں ہم نے مل کر افطار کیا، والدہ کے جانے کے بعد بخار ہوا جس کے بعد ٹیسٹ کرانے کا سوچا۔
انہوں نے کہا کہ مجھے رات کو ہی قرنطینہ کرلینا چاہئے تھا لیکن صبح قرنطینہ ہوا ہوں، اپنی والدہ اور گھر والوں کا کرونا ٹیسٹ کراؤں گا۔
عمران اسماعیل نے کہا کہ مجھ میں کرونا کی کوئی علامات نہیں ہیں، ابھی تو مکمل صحت یاب ہوں۔
واضح رہے کہ اس سے قبل وزیر تعلیم سندھ سعید غنی بھی کرونا وائرس میں مبتلا ہوگئے تھے تاہم چند روز بعد ان کی رپورٹ منفی آگئی تھی، انہوں نے دعائیں کرنے اور حوصلہ افزائی کرنے والوں کا شکریہ ادا کیا تھا۔
یاد رہے کہ محکمہ صحت سندھ کے مطابق 24 گھنٹے کے دوران سندھ میں 341 افراد میں کرونا وائرس کی تصدیق ہوئی، کراچی میں 275 افراد میں کرونا وائرس کی تصدیق ہوئی ہے۔
سندھ بھر میں کرونا کے 925 مریض صحت یاب ہوچکے ہیں اور کرونا سے اموات کی تعداد 85 ہوگئیں۔
محکمہ صحت سندھ کے مطابق سندھ بھر میں اب تک 43 ہزار 494 افراد کے ٹیسٹ کیے جاچکے ہیں، 24 گھنٹے میں 2 ہزار 733 افراد کے کرونا ٹیسٹ کیے گئے۔
