کراچی: سندھ حکومت نے صارم برنی ویلفیئر ٹرسٹ کے معاملات اپنے ہاتھ میں لینے کا فیصلہ کیا ہے۔
تفصیلات کے مطابق سماجی رہنما صارم برنی کی بچوں کو اسمگل کرنے کے الزام میں گرفتاری کے بعد حکومت سندھ نے صارم برنی ٹرسٹ کے معاملات اپنے ہاتھ میں لینے کا فیصلہ کرلیا ہے۔
سندھ حکومت کے محکمہ سوشل ویلفیئر نے ہدایت جاری کردی، ایف آئی اے نے صارم برنی سے متعلق بچے اسمگلنگ کیس کے تحت سندھ حکومت کو مراسلہ لکھا تھا۔
مراسلے میں کہا گیا تھا کہ صارم برنی یتیم خانے کے معاملات سندھ حکومت کا محکمہ سوشل ویلفیئر خود دیکھے گا اور یہ فیصلہ بھی سامنے آیا ہے کہ سندھ حکومت صارم برنی ٹرسٹ کے یتیم خانے کے معاملات بھی خود سنبھالے گی۔
واضح رہے کہ صارم برنی پر پاکستان سے امریکا میں بچوں کی اسمگلنگ کا الزام ہے، امریکی قونصل خانے کی درخواست پر صارم برنی کو امریکا سے واپسی پر 5 جون کو گرفتار کیا گیا تھا۔
