کراچی : سندھ حکومت نے گاڑیوں کی خریدو فروخت کو نادرا سسٹم کے ساتھ منسلک کرنے کا فیصلہ کرلیا، جس کے تحت خریداری کےایک ماہ کے اندر گاڑی اپنے نام منتقل کرانا ہو گی۔

تفصیلات کے مطابق حکومت سندھ نے گاڑیوں کی خرید و فروخت کو نادرا کے نظام سے منسلک کرنے کا فیصلہ کرلیا ہے، اس حوالے سے ایکسائز ڈیپارٹمنٹ اور نادرا کے درمیان ابتدائی معاملات طے پاگئے ہیں۔

ڈی جی ایکسائز شعیب صدیقی نے کہا ہے کہ خریداری کےبعدایک ماہ کے دوران گاڑی اپنے نام کرانا لازمی ہوگا اور نادرا مراکز یا کسی بھی فرنچائز پر بائیومیٹرک سے خریداری کا عمل مکمل کرنا ہوگا۔

ڈی جی ایکسائز کا کہنا تھا کہ خریدار اور فروخت کنندہ کوقریبی نادرا مرکزجانا ہوگا، دونوں کے انگوٹھوں کےنشانات کےبعد نادرا سے سلپ ملے گی ، جس کے ذریعے ہی صرف گاڑی ٹرانفسر کی جاسکے گی۔

شعیب صدیقی نے کہا کہ اوپن لیٹرگاڑی چلانے سے نہ صرف حکومت بلکہ امن وامان کا بھی مسئلہ ہوتا ہے ، 4 بار گاڑی فروخت ہوتی ہے تو صرف ایک بار ہی ٹرانسفر کرائی جاتی ہے۔

ان کا مزید کہنا تھا کہ بائیومیٹرک سےٹرانسفر کرانے سے وہیکل ٹیکس اور ریونیو میں 30 فیصد اضافہ ہوگا۔