کراچی : سندھ حکومت نے کراچی اورحیدرآباد کے بلدیاتی انتخابات رکوانے کیلئے آرڈیننس لانے کی خبروں کی تردید کردی۔
تفصیللات کے مطابق سندھ حکومت نےکراچی اورحیدرآبادبلدیاتی انتخابات کے التوا کے حوالے سے بیان میں کہا ہے کہ کراچی اور حیدرآباد بلدیاتی انتخابات رکوانے کیلئے کوئی آرڈیننس نہیں لایا جارہاہے۔
ذرائع سندھ حکومت کا کہنا تھا کہ سندھ حکومت کسی قسم کے آرڈیننس پرغورنہیں کررہی ہے، آرڈیننس کی ضرورت نہیں ہے نا کسی کے کہنے پر آرڈیننس جاری کریں گے۔
ذرائع نے کہا ہے کہ حساس اداروں کی رپورٹ اور تھریٹ سے الیکشن کمیشن کوآگاہ کیاہے، امید کرتے ہیں الیکشن کمیشن فیصلے میں عوام کے تحفظ کو ترجیح دے گی۔
خیال رہے کراچی اور حیدرآباد بلدیاتی الیکشن پر سندھ حکومت الیکشن کمیشن کو 2 خط لکھ چکی ہے ، جس میں کہا گیا تھا کہ قانون نافذ کرنے والے اداروں کی رپورٹ کو سنجیدگی سے لیاجائے۔
خط میں درخواست کی گئی ہے کہ الیکشن کمیشن صوبائی حکومت اور اداروں کی رپورٹ پر فیصلہ کرے اور الیکشن کا فیصلہ کرتے وقت عوام کے جان و مال کی حفاظت کو ترجیح دی جائے، بلدیاتی الیکشن کےدوران گلی گلی میں امن و امان کا مسئلہ رہتا ہے۔
