کراچی : سندھ حکومت کے ترجمان مرتضیٰ وہاب کا کہنا ہے کہ جامعہ کراچی میں قائم کورونا ٹیسٹ لیبارٹری آج سے کام شروع کرے گی ، جس کے بعد جامعہ کراچی روزانہ800ٹیسٹ ہوسکیں گے۔
تفصیلات کے مطابق سندھ حکومت کے ترجمان مرتضیٰ وہاب نے سماجی رابطے کی ویب سائٹ ٹوئٹر پر اپنے پیغام میں کہا کہ سندھ حکومت نے جامعہ کراچی میں میں کورونا ٹیسٹ لیبارٹری قائم کردی، لیبارٹری انٹرنیشنل سینٹرفورکیمیکل اینڈبائیولوجیکل ریسرچ سینٹرمیں قائم کی گئی، لیب آج سے کام شروع کرے گی، جس کے بعد روزانہ 800ٹیسٹ ہوسکیں گے۔
#SindhGovt has established a #COVIDー19 laboratory at the International Center for Chemical and Biological Research, Karachi University. It has become functional from today with a capacity of 800 tests a day. pic.twitter.com/3TQc59GKvB
— SenatorMurtaza Wahab (@murtazawahab1) April 23, 2020
خیال رہے چند روز قبل ہی جناح اسپتال میں پہلی بائیوسیفٹی لیول تھری لیب قائم کی گئی تھی، مرتضیٰ وہاب کا کہنا تھا کہ جناح اسپتال میں قائم بائیوسیفٹی لیبارٹری نےکام شروع کردیا، لیبارٹری میں یومیہ100کورونا ٹیسٹ ہوں گے ، اگلےمرحلےمیں کوروناٹیسٹ کی استعداد بڑھائی جائے گی۔
یاد رہے رواں ماہ سندھ حکومت نے کورونا کی وبا پر قابو پانے کے لئے کورونا کے ٹیسٹ کے مراکز کا دائرہ وسیع کرنے کا فیصلہ کیا تھا ، اس مقصد کے لئے وزیر اعلیٰ سندھ مراد علی شاہ نے 58.28 ملین روپے جاری کرنے کی بھی منظوری دی تھی، جس پر وی سی خالد عراقی نے اظہار تشکر کیا تھا۔
واضح رہے پاکستان میں کورونا کے مریضوں کی تعداد 10 ہزار سے تجاوز کر چکی ہے جبکہ 24 گھنٹوں میں 15 افراد کی موت ہوئی، جس کے بعد پاکستان میں جاں بحق افراد کی تعداد 224 ہوگئی۔
پنجاب میں کرونا وائرس کے مریضوں کی تعداد 4590 تک پہنچ گئی جبکہ سندھ میں 3373 افراد میں وائرس کی تشخیص ہو چکی ہے۔
