کراچی : سندھ حکومت نے’اسلام آباد پر حملے’ کو ناکام بنانے کیلئے وفاق کا ساتھ دینے کا اعلان کردیا اور کہا یہ حقیقی آزادی مارچ نہیں پاکستان کو کمزور کرنے کی کوشش ہے۔
تفصیلات کے مطابق صوبائی وزیر اطلاعات سندھ شرجیل انعام میمن نے اپنے اہم بیان میں کہا کہ 5 ماہ میں عمران خان اسلام آباد پر دوسری چڑھائی کرنے جا رہے ہیں، عمران خان کا ایک نکاتی ایجنڈا صرف اقتدار کی بھوک ہے۔
شرجیل میمن کا کہنا تھا کہ عمران خان اقتدار کی کرسی تک پہنچنے میں لاشوں سے گزرنے سے بھی گریز نہیں کریں گے۔
صوبائی وزیر نے سوال کیا کیا قوم اپنے دارالخلافہ پر حملہ کے لیے اس جھوٹے ، مکار شخص کا ساتھ دے گی۔ کیا محبت وطن پاکستانی اپنی بھادر افواج ، ریاستی اداروں کے خلاف گھناوٴنی سازشوں میں مصروف عمران خان نیازی کا ساتھ دیں گے۔
انھوں نے پی ٹی آئی ارکان قومی و صوبائی اسمبلیوں سے گزارش کی کیا وہ پاکستان کے شہہ رگ اسلام آباد پر چڑھائی میں عمران خان کا ہتھیار بننے جا رہے ہیں، یہ حقیقی آزادی مارچ نہیں پاکستان کو کمزور کرنے کی سازش ہے۔ عمران خان اپنے بیرونی فنانسرز کے بتائے ہوئے راستے پر چل رہے ہیں۔
شرجیل انعام میمن نے کہا کہ سندھ حکومت اسلام آباد پر حملہ کو ناکام بنانے کیلئے وفاق کا بھرپور ساتھ دے گی۔سندھ پولیس کے جوان اسلام آباد پہنچ چکے ہیں۔
