کراچی: سندھ میں رینجرز کو حاصل خصوصی اختیارات میں توسیع نہ ہوسکی، گرفتاری اور تحقیقات کے اختیارات رات بارہ بجے ختم ہوگئے۔
سندھ میں رینجرز کے خصوصی اختیارات میں توسیع کا معاملہ پھر اٹک گیا، وزارت داخلہ نے رینجرز اختیارات میں نوے روز کی توسیع کی سمری وزیر اعلیٰ سندھ کو بھیجی تھی، جو تاحال وزیر اعلیٰ سندھ کی منظوری کی راہ تک رہی ہے۔
رینجرزکوسندھ میں حاصل خصوصی اختیارات رات بارہ بجےختم ہوچکے ہیں، سمری کی منظوری سے رینجرزکوگرفتاری اورتحقیقات کےخصوصی اختیارات حاصل تھے۔
سندھ میں کارروائیوں پر سندھ حکومت تحفظات پر پہلے بھی دو بار رینجرز کو اختیارات دینے کا معاملہ لٹک گیا تھا اور وفاق کو رینجرز کےاختیارات کیلئے مداخلت کرنا پڑی تھی ،حکومت سندھ فروری میں رینجرز اختیارات میں تین ماہ کی توسیع کی تھی۔
واضح رہے کہ اس سے قبل آج وزیر اعلیٰ سندھ قائم علی شاہ اور ڈی جی رینجرز سندھ میجر جنرل بلال اکبر کے درمیان ملاقات ہوئی جس میں نیشنل ایکشن پلان اور کراچی آپریشن کی پیش رفت کے بارے میں گفتگو کی گئی۔
ڈی جی رینجرز نے وزیراعلیٰ کو سندھ میں حالیہ گرفتاریوں کے متعلق معلومات دیں اور آگاہ کیا کہ مذکورہ ملزمان کے پکڑے جانے کے بعد جرائم کی شرح میں کمی آئی ہے۔
وزیر اعلیٰ سندھ نے ڈی جی رینجرز کو اس حوالے سے اپنے مکمل تعاون کی یقین دہانی کروائی۔ انہوں نے رینجرز کی کارکردگی کو بھی سراہا۔
وزیر اعلیٰ کا کہنا تھا کہ کراچی شہر میں امن و امان کے لیے رینجرز کا کردار قابل تعریف ہے اور ہم ان کی کوششوں کو قدر کی نگاہ سے دیکھتے ہیں۔
