کراچی: محکمہ تعلیم سندھ نے نیویارک کے تعلیمی اداروں کے ساتھ آن لائن کوآرڈینیشن پروگرام شروع کرنے کا فیصلہ کر لیا۔
صوبائی وزیر تعلیم سردار علی شاہ سے نیو یارک اسٹیٹ کے اسپیکر اسمبلی فل راموس (Mr Phil Ramos) نے وفد کے ہمراہ ملاقات میں اس بات پر اتفاق کیا کہ اسکولز کو ایک دوسرے کے ساتھ رابطے میں لا کر ایک دوسرے سے سیکھنے کے مواقع کو فروغ دیا جا سکتا ہے۔
ملاقات میں سیکریٹری اسکول ایجوکیشن سندھ زاہد علی عباسی، سیکریٹری کالج ایجوکیشن صدف انیس شیخ، چیف پروگرام مینجر آر ایس یو ڈاکٹر جنید سموں و دیگر افسران نے بھی شرکت کی جبکہ 32 رکنی وفد میں اسمبلی رکن ایلیک بروک، امریکن پاکستانی کمیٹی کے ڈاکٹر اعجاز، امتیاز راہی، امتیاز پیرزادہ، عامر میمن اور دیگر بھی موجود تھے۔
وزیر تعلیم سید سردار شاہ نے نیو یارک اسٹیٹ کے اسپیکر اسمبلی فل راموس اور وفد کو سندھ میں تعلیمی چیلینجز کے سلسلے میں آگاہی دی۔
صوبائی وزیر نے کہا کہ ایک دوسرے سے سیکھنے کیلیے ورچوئل نظام کے تحت تعاون کو بڑھایا جا سکتا ہے، ہم اسکولز کو ایک دوسرے کے ساتھ رابطے میں لا کر مؤثر کوآرڈینیشن کر سکتے ہیں۔
وفد نے اس بات پر اتفاق کیا کہ سندھ کے اسکولز اور نیویارک کے اسکولز کے مابین آن لائن کوآرڈینیشن قائم کیا جائے۔
ملاقات میں اتفاق ہوا کہ پہلے مرحلے میں ایک سرکاری اور ایک نجی اسکول کا نیویارک کے اسکولز کے ساتھ ورچوئل رابطہ شروع کیا جائے گا۔ سندھ اور نیویارک کے اسکولز کی کانفرسنگ کنیکٹوٹی سے اساتذہ اور طلبا ایک دوسرے سے معلومات کا تبادلہ کر سکیں گے۔
اس موقع پر فل راموس نے کہا کہ وہ نیویارک کمیونٹی کے طرف سے ہر ممکن تعاون کا یقین دلاتے ہیں، آن لائن کانفرنسنگ کے ذریعے امریکی طلبہ پاکستان کے بارے میں پاکستانی اساتذہ اور پاکستانی اساتذہ امریکیوں سے سیکھ سکتے ہیں۔
انہوں نے مزید کہا کہ امریکی اور پاکستانی تعلیمی اداروں کے آن لائن کوآرڈینیشن سے تکنینکی تعلیم اور شارٹ کورسز کو بھی متعارف کروایا جا سکتا ہے۔
ملاقات میں اس بات پر بھی اتفاق ہوا کہ دونوں ملکوں کو عوام سے عوام تک رابطہ کاری کے سلسلے بڑھانے کے اقدامات کو فروغ دیا جائے۔
