کراچی: وزیراعلیٰ مراد علی شاہ نے کہا ہے کہ سندھ وفاق کی کالونی نہیں، ہمارے منصوبے نہیں ملے تو بجٹ پاس نہیں ہوگا۔
اے آر وائی نیوز کے مطابق وزیراعلیٰ سندھ مراد علی کا کہنا تھا کہ بلاول بھٹو کا مؤقف واضح ہے وفاقی بجٹ پاس نہیں ہونےدیں گے، سندھ کے ساتھ سوتیلوں جیسا سلوک بند کیا جائے، کےفور منصوبے پر وفاق نے صرف 3 ارب رکھے، کم ازکم 20 ارب درکار ہیں۔
سندھ کے چیف ایڈمنسٹریٹر نے کہا کہ سندھ حکومت نے کےفور کےلیے 68 ارب روپے دیے، وفاق نے 400 ارب کے سکھر حیدرآباد موٹروے کیلئے صرف 15 ارب رکھے۔
بجٹ 26-2025: سندھ کابینہ نے ملازمین کی تنخواہوں میں اضافے کی منظوری دے دی
مراد علی شاہ نے کہا کہ وفاق نے تین صوبوں کے پی ڈبلیو ڈی فنڈز دیے، سندھ کو محروم رکھا، سندھ وفاق کی کالونی نہیں، کراچی کی دعویدارجماعت کہاں ہے اور شہر کو دیا کیا ہے؟ کراچی کو صرف بھتہ خوری اور بوری بند لاشیں دی گئیں۔
وزیراعلیٰ سندھ کا کہنا تھا کہ شاہراہ بھٹو آج سے شروع ہوا، ایک شخص کے اسلحہ لہرانے کی ویڈیو وائرل ہوئی، منصوبے پر تنقید کرنا چھوڑیں۔
