کراچی : وزیر صحت سندھ عذرا پیچوہو کی زیر صدارت اجلاس میں تعلیمی ادارے طویل مدت کیلئے بند کرنے کی تجویز دیتے ہوئے فیصلہ کیا گیا کہ سرکاری اور نجی اسپتالوں میں فوری طور پر کرونا انفارمیشن ڈیسک قائم کی جائے۔
تفصیلات کے مطابق وزیر صحت سندھ عذرا پیچوہو کی زیر صدارت کروناوائرس سے متعلق وزارت صحت سندھ کے دفتر میں ہنگامی اجلاس ہوا، گزشتہ روز 9 نئے کیسز سامنے آنے کے بعد آج اجلاس بلانے کا فیصلہ کیا گیا، جس میں وزارت صحت سندھ کے نمائندے ، ڈی ایچ اوز اور اسپتالوں کےڈائریکٹر شریک ہوئے۔
اجلاس میں کروناوائرس کی صورتحال پر غور کیا گیا اور حکومتی اقدامات کا جائزہ لینے کےساتھ نئی حکمت عملی بھی زیر بحث آئی جبکہ بریفنگ میں بتایا گیا کہ گڈاپ کےاسپتال میں آئسولیشن،پازیٹوکیسزکے حوالے سےفعال ہے۔
وزیر صحت سندھ عذرا پیچوہو کی زیر صدارت اجلاس میں تعلیمی ادارے طویل مدت کیلئے بند کرنے کی تجویز وزیراعلیٰ سندھ کو پیش کی گئی اور فیصلہ کیا گیا کہ پبلک مقامات پر جمع ہونے سے گریز کیلئے ایڈوائزری جاری کی جائے اور سرکاری،نجی اسپتالوں میں فوری طور پر کرونا انفارمیشن ڈیسک قائم کی جائے۔
مزید پڑھیں : کراچی میں کرونا وائرس کے 8 نئے کیسز سامنے آگئے
اجلاس میں فیصلہ کیا گیا کہ ہوم کورنٹین کیلئے14روزہ ایڈوائزری آج جاری کی جائے گی اور نجی اسپتالوں کو کرونا پازیٹوکیسز سےمتعلق ایس او پیز سے آگاہ کیا جائے۔
محکمہ صحت سندھ نے کراچی ایئرپورٹ پر اپنی ڈیسک قائم کرنےکافیصلہ کرتے ہوئے کہا ایئرپورٹ پرتمام مسافروں کی اسکریننگ محکمہ صحت کاعملہ کرےگا۔
یاد رہے گذشتہ روز ملک میں کرونا وائرس کے مزید نو کیسز سامنے آئے تھے، جس کے بعد متاثرہ افراد کی تعداد سولہ ہوگئی تھی، جن میں سے 13 کا تعلق کراچی سے ہے۔
معاون خصوصی صحت ڈاکٹر ظفرمرزا نے ٹوئٹ میں کراچی میں مزید نوکیسز کی تصدیق کرتے ہوئے کہا تھا کہ متاثرہ افراد پہلے سے کروناوائرس میں مبتلا شخص سے رابطےمیں تھے،متاثرہ شخص سے رابطے میں رہنے والے مزید افراد تک پہنچ کر ٹیسٹ کیے جارہے ہیں۔
ترجمان محکمہ صحت سندھ کےمطابق کرونا وائرس کے پانچ مریض دوحہ اور شام سے پاکستان پہنچے جبکہ تین لندن سے کراچی پہنچے ہیں جبکہ صوبائی وزیر ناصر حسین شاہ کا کہنا تھا کہ بیرون ملک سے آنے والوں کا ڈیٹا اکٹھا کیاگیاہے۔
خیال رہے کرونا وائرس کےپھیلاؤ کےخدشہ پرپاک افغان سرحد آج نویں روز بھی بندہے، جس کے باعث پاک افغان ٹرانزٹ ٹریڈ اور نیٹو سپلائی معطل ہے۔
