کراچی : اندرون سندھ ایرانی آئل اور نان کسٹم پیڈ گاڑیوں کی اسمگلنگ میں سندھ پولیس کے ملوث ہونے کے انکشاف کے بعد ایس ایچ اوز سمیت اٹھائیس اہلکاروں کو معطل کردیا گیا۔
تفصیلات کے مطابق ایرانی آئل اور نان کسٹم پیڈ گاڑیوں کی اسمگلنگ میں سندھ پولیس کے ملوث ہونے کا انکشاف سامنے آیا ، جس کے بعد آئی جی سندھ کی ہدایت پر ایکشن لیتے ہوئے سندھ پولیس کے ایس ایچ اوز سمیت اٹھائیس اہلکاروں کو معطل کردیا گیا۔
معطل ہونےوالوں میں جیکب آباد ،کشمور،شکارپور، سکھرپولیس کےافسران واہلکار شامل ہیں، اس کے ساتھ ہی آئی جی سندھ نے ایڈیشنل آئی جی عمران یعقوب کی سربراہی میں کمیٹی قائم کر دی ہے۔
ڈی آئی جی کرائم برانچ عامر فاروقی اور ایس ایس پی دادو عبدالخالق پیرزادہ بھی تحقیقاتی کمیٹی کا حصہ ہیں۔
دوسری جانب رات گئے کوئٹہ پولیس کے دو اہلکاروں کو کراچی میں منشیات اسمگل کرتے ہوئے ساتھی سمیت گرفتار کرلیا گیا ، ان کے قبضے سے ساڑھے اٹھارہ کلو سے زائد منشیات برآمد ہوئی۔
