شکارپور: وفاقی حساس ادارے اور شکارپور پولیس نے سبی کے قریب مشترکہ آپریشن کیا جس کے نتیجے میں کالعدم تنظیم کے 2 دہشت گرد ہلاک ہوگئے۔
تفصیلات کے مطابق وفاقی حساس ادارے اور شکارپور پولیس نے سبی کے قریب مشترکہ آپریشن کیا جس کے نتیجے میں کالعدم تنظیم کے 2 دہشت گرد ہلاک ہوگئے، ہلاک دہشت گرد عبداللہ بروہی، حفیظ پندرانی انتہائی مطلوب تھے۔
پولیس کے مطابق ہلاک دہشت گرد سیہون بم دھماکے کے ماسٹر مائنڈ تھے، ہلاک دہشت گرد شکار پور امام بارگاہ دھماکے کے مرکزی ملزمان تھے۔
پولیس کے مطابق مشترکہ آپریشن کے دوران 2 دہشت گرد فرار ہوئے جن کی تلاش میں چھاپے مارے جارہے ہیں۔
رپورٹ کے مطابق ہلاک دہشت گردوں کے قبضے سے تخریب کاری کا سامان اور اسلحہ برآمد کرلیا گیا ہے، ہلاک دہشت گرد حفیظ پندرانی سندھ میں کالعدم تنظیم کا نیٹ ورک چلا رہا تھا۔
سندھ پولیس نے دہشت گردوں کو انجام تک پہنچایا، آصف زرداری
دوسری جانب آصف علی زرداری نے کہا ہے کہ سندھ پولیس نے دہشت گردوں کو انجام تک پہنچایا ہے، دہشت گرد ناسور ہیں، انہیں معاف نہ کیا جائے، دہشت گردوں کا خاتمہ ہمارا بنیادی مقصد ہے۔
انہوں نے کہا کہ دہشت گرد کے ساتھیوں، سہولت کاروں کو بھی گرفت میں لایا جائے، دہشت گردی کی نرسریوں کو تباہ کیا جائے۔
مزید پڑھیں: درگاہ لعل شہباز قلندر پر خودکش حملہ،76افراد شہید، 250 زخمی
واضح رہے کہ دو سال قبل درگاہ لعل شہباز قلندر میں دھمال کے دوران خودکش حملے کے نتیجے میں 76 افراد شہید اور 250 سے زائد زخمی ہوگئے تھے، شہید ہونے والوں میں 20 بچے، 9 خواتین، 45 مرد اور ایک پولیس اہلکار شامل تھے۔
