کراچی : محکمہ صحت سندھ نے کہا ہے کہ 34 نئے کیسز رپورٹ ہونے کے بعد سندھ بھر میں کرونا وائرس کے مریضوں کی مجموعی تعداد 700 سے تجاوز کرگئی۔
تفصیلات کے مطابق چین سے پھیلنے والے جان لیوا کرونا وائرس سے متاثرہ افراد کی تعداد میں سندھ بھر میں مسلسل اضافہ ہورہا ہے، محکمہ صحت سندھ نے بتایا ہے کہ صوبے میں مزید 34 افراد میں خطرناک وائرس کی تشخیص ہوئی ہے۔
محکمہ صحت نے بتایا کہ شہر قائد میں مزید 17 نئے کیسز رپورٹ ہوئے ہیں، حیدر آباد میں 9، شہید بے نظیر آباد میں 6 اور جامشورو میں 2 نئے کیسز رپورٹ ہوئے ہیں جس کے بعد مجموعی طور پر سندھ بھر میں 743 لوگ کرونا وائرس کا شکار ہیں۔
سندھ میں کرونا کی مقامی منتقلی کے کیسز کی تعداد 410 ہوگئی، خوش آیند بات یہ ہے کہ ملک بھر میں جان لیوا وائرس میں مبتلا 94 افراد صحت یاب بھی ہوچکے ہیں جن میں 54 کا تعلق صوبہ سندھ سے ہے، خیال رہے کہ گزشتہ روز سندھ میں کرونا وائرس کے مجموعی کیسز کی تعداد 676 تھی۔
واضح رہے کہ ملک بھر میں ہلاکت خیز وائرس کے 120 نئے کیسز رپورٹ ہونے کے بعد مجموعی تعداد 2238 ہوگئی ہے جبکہ چار مزید افراد کی موت کے بعد جاں بحق افراد کی تعداد 31 تک پہنچ گئی ہے جن میں سے 9 کا تعلق سندھ سے ہے۔
