کراچی: محکمہ تعلیم سندھ نے موسم کے پیش نظر اسکولز کی تعطیلات 14 اگست تک بڑھانے کا فیصلہ کرلیا۔
اے آر وائی نیوز کے مطابق وزیر تعلیم سندھ سید سردار علی شاہ کی ہدایت پر محکمہ تعلیم نے 14 اگست تک اسکولز میں تعطیلات بڑھانے کا نوٹیفکیشن جاری کردیا۔
وزیر تعلیم سندھ نے کہا کہ گرمی اور برسات کے امکان پر تعطیلات میں اضافے کا فیصلہ کیا گیا ہے۔
- Advertisement -
انہوں نے کہا کہ اسکولوں میں 14 اگست سے ہم نصابی سرگرمیوں کو جاری رکھا جائے گا، تمام نجی و سرکاری اسکولز جشن آزادی سے متعلق پروگرامز منعقد کریں گے۔
سردار علی شاہ نے کہا کہ تعطیلات کے بعد سندھ میں نیا تعلیمی سال 15 اگست سے شروع ہوگا۔
واضح رہے کہ سندھ میں جون جولائی کی چھٹیوں کے بعد اسکولز یکم اگست سے کھولے جانے تھے تاہم موسم کی صورتحال کے پیش نظر اب اسکولز 15 اگست سے کھلیں گے۔
