کراچی : جامعات میں حکومت کی مداخلت کے خلاف کراچی یونیورسٹی سمیت سندھ کی سرکاری جامعات کے اساتذہ آج ہڑتال کریں گے اور تدریسی عمل معطل رہے گا۔
تفصیلات کے مطابق کراچی یونیورسٹی سمیت سندھ کی تمام سرکاری جامعات میں تدریسی عمل معطل کردیا گیا ہے، انجمن اساتذہ جامعہ کراچی کے صدر پروفیسر شکیل الرحمان کا کہنا ہے کہ جامعات میں حکومت کی مداخلت ناقابل قبول ہے، ہم نے مطالبات کی منظوری کے لئے تیس اگست کی ڈیڈ لائن دی تھی مگر حکومت نے نوٹس نہیں لیا ۔
تدرسی اور غیر تدریسی ملازمین نے جامعہ کراچی کے ڈائریکٹرفنانس کی برطرفی کا مطالبہ ہے جبکہ لیو ۔ ان ۔ کیش کی ادائیگی بھی مطالبات میں شامل ہے۔
اس سے قبل بھی جامعات کے معاملات میں حکومتی مداخلت کے باعث ہڑتال کی گئی تھی، اساتذہ کا کہنا تھا کہ جامعات کی ساکھ کو سیاسی بنیادوں پر سفارشی افسران کی تعیناتی کے ذریعے متاثر کیا جارہا ہے ۔
اساتذہ نے جامعہ این ای ڈی اور کراچی یونیورسٹی سمیت دیگر سرکاری جامعات میں بازوؤں پر سیاہ پٹیاں باندھ کر اور مظاہرے کرکے اپنا احتجاج ریکارڈ کروایا اور تدریسی عمل بھی معطل رکھا۔
