کراچی : سندھ کا آئندہ مالی سال کا بجٹ آج پیش کیا جائے گا، بجٹ ممکنہ طور پر تین ہزار چار سو ارب سے زائد ہوگا۔
تفصیلات کے مطابق نئے مالی سال کے لیے سندھ کا بجٹ آج پیش کیا جائے گا، سندھ اسمبلی کا بجٹ اجلاس سہ پہر تین بجے ہوگا، جس میں وزیراعلیٰ سندھ مراد علی شاہ بجٹ پیش کریں گے۔
سندھ میں سرکاری ملازمین کی تنخواہ میں 10 سے 20 فیصد اضافے اور مزدور کی کم از کم اجرت میں 5 ہزار روپے اضافے کی تجویز ہے۔
صوبے کے ترقیاتی بجٹ کا تخمینہ ایک ہزار اٹھارہ ارب کے قریب رکھا گیا ہے جبکہ ترقیاتی پروگرام چار سو ترانوے ارب سے بڑھا کرپانچ سو بیس ارب رکھنے اور ضلعی ترقیاتی پروگرام کیلئے پچپن ارب روپے مختص کرنے کی تجویز دی گئی ہے۔
وفاق سے چھہتر ارب کی ترقیاتی گرانٹس ملنے کا تخمینہ لگایا گیا ہے جبکہ غیر ملکی منصوبہ جاتی امداد کے تحت تین سو چھیاسٹھ ارب روپے ملنےکا امکان ہے۔
بجٹ میں تین ہزار آٹھ سو چھپن ترقیاتی اسکیمیں شامل ہیں، جس میں پانچ سو چھیاسٹھ نئی اسکیموں کی تجویز دی گئی ہے۔
اسکول ہیڈ ماسٹرز کو مالیاتی اختیارات دینے، 34 ہزار اسکولوں کو براہ راست فنڈز جاری کرنے اور چونیتس ہزار اسکولوں کیلئے اٹھارہ ارب روپے مختص کرنے کی بھی تجویز دی گئی ہے۔
ایم این ایز اور ایم پی ایز کے فنڈز کیلئے پینتالیس ارب اور ڈویژنل ہیڈکوارٹرز کیلئے سات ارب کے ترقیاتی پیکیج کی تجویز دی گئی ہے۔
اس کے علاوہ تعلیم کا ترقیاتی بجٹ بتیس ارب سے بڑھا کراڑتیس ارب کرنے اور صحت کا ترقیاتی بجٹ اٹھارہ ارب سے بڑھا کر اکیس ارب روپےکرنے کی تجویز بھی دی گئی ہے۔
