ماہ رمضان میں اکثر لوگ افطاری میں سموسوں اور پکوڑوں کو زیادہ فوقیت دیتے ہیں جبکہ بہت سے افطار کے ساتھ ہی رات کا کھانا کھانا پسند کرتے ہیں ایسے لوگوں کیلیے سنگاپورین رائس بہترین ڈش ہے۔

اے آر وائی ڈیجیٹل کے پروگرام شان رمضان کے سیگمنٹ ’شان دسترخوان‘ میں شیف عائشہ نے مزیدار سنگاپورین رائس بنانے کی ترکیب بتائی جس سے آپ کے افطار کی رونق مزید دوبالا ہوجائے گی۔

سنگا پورین رائس کا تعلق سنگا پور سے ہرگز نہیں البتہ اسے اس کے بہترین ذائقے کی بدولت پاکستان اور دیگر ممالک میں نہایت ذوق و شوق سے کھایا جاتا ہے۔

اجزاء :

ایگ نوڈلز: آدھا پیکٹ

چکن (پتلے اور لمبے کٹے ہوئے ٹکڑے): 1 پاؤ

چاول: 2 کپ

شملہ مرچ (کیوبز کی شکل میں کاٹ لیں): 1 عدد

گاجر (کیوبز میں کٹے ہوئے): 1 عدد

بند گوبھی: ایک چوتھائی

ہری پیاز: 1 عدد

ہری مرچ: 4 عدد

لہسن (کچلے ہوئے): 4 جوئے

مایونیز: آدھا کپ

کٹی لال مرچ: 1 کھانے کا چمچ

وائٹ پیپر: آدھا چائے کا چمچ

بلیک پیپر: آدھا چائے کا چمچ

نمک: حسب ذائقہ

اوسٹر سوس: 1 کھانے کا چمچ

واچسٹر سوس: 2 کھانے کے چمچ

کیچپ: 2 کھانے کے چمچ

چلی گارلک سوس: 2 کھانے کے چمچ

کارن فلور: حسب ضرورت

ترکیب

ایگ نوڈلز کو ہلدی ڈال کر ابال لیں اور پھر ڈیپ فرائی کر لیں۔

پانی میں نمک، ایک چائے کا چمچ زیرہ اور تیل ڈال کر چاول ڈال دیں اور پلاؤ کی طرح دم دیں۔

لہسن اور ہری مرچ کو فرائی کر کے نکال لیں۔

تیل میں ادرک لہسن پیسٹ ڈال کر فرائی کریں، پھر چکن ڈال دیں۔ پھر ساری سبزیاں ڈال کر فرائی کریں۔

اب وائٹ پیپر، بلیک پیپر اور نمک ڈال دیں۔

اس کے بعد اوسٹر سوس، واچسٹر سوس، کیچپ، چلی گارلک سوس ڈال دیں۔

اب آدھا کپ پانی ڈالیں اور کارن فلور ڈال دیں۔

مایونیز میں کٹی لال مرچ اور دو کھانے کے چمچ پانی ڈال کر اچھی طرح مکس کریں۔

ڈش میں پہلے ابالے ہوئے چاول ڈالیں، پھر چکن اور سبزیاں ڈالیں۔ اسی طرح دوسری تہہ لگائیں۔ پھر اوپر سے نوڈلز ڈالیں۔ مایونیز ڈالیں اور لہسن، ہری مرچ جو فرائی کی تھی ڈال دیں۔

مزیدار سنگا پورین رائس تیار ہیں اب اسے اپنے دسترخوان پر سجالیں