پاکستانی فلموں کے کئی سدا بہار اور لازوال رومانوی گیت ایسے ہیں جنھیں آج بھی نہ صرف بڑے شوق سے سنا جاتا ہے بلکہ اکثر انھیں گنگناتے بھی ہیں۔ ان نغمات کے بول محبّت اور جذبات کی فراوانی کے ساتھ محبوب کے لیے شیریں اور لطیف احساسات سے سجے ہوئے ہیں، لیکن منیر حسین کی آواز میں اپنے زمانے کا ایک مقبول گیت اس اعتبار سے یکسر مختلف ہے کہ اس میں ایک ناکام عاشق نے اپنی محبّت کو بد دعائیں دی ہیں۔ آج معروف گلوکار منیر حسین کی برسی منائی جارہی ہے۔
27 ستمبر 1995ء کو وفات پانے والے گلوکار منیر حسین کی آواز میں مقبول ہونے والے اس گیت کے چند اشعار ہم یہاں نقل کررہے ہیں۔ یہ مشہور نغماتی فلم سات لاکھ کا گیت ہے
قرار لوٹنے والے تو پیار کو ترسے!
میری وفا کو میرے اعتبار کو ترسے
خدا کرے تیرا رنگیں شباب چھن جائے
تیری شراب جوانی خمار کو ترسے
تو روئے رات کی تنہائیوں میں اٹھ اٹھ کر
تجھے قرار نہ آئے، قرار کو ترسے
خدا کرے تیرے دل کی کلی کبھی نہ کھلے
بہار آئے مگر تُو بہار کو ترسے
منیر حسین 1930ء میں پیدا ہوئے۔ پاکستان بننے کے بعد وہ فلم انڈسٹری میں بطور گلوکار اپنی قسمت آزمانے پہنچے اور یہاں انھیں کام مل گیا۔ منیر حسین فنِ موسیقی کے دلدادہ تھے اور اس گھرانے کے فرد تھے جو سُر اور ساز سے محبّت کرتا تھا اور فن کار رہتے تھے۔ منیر حسین گویا آل راؤنڈر تھے اور کلاسیکی موسیقی میں بھی ماہر تھے۔ فلم انڈسٹری میں موسیقار صفدر حسین نے انھیں پہلی مرتبہ متعارف کروایا۔ انہی کی فلم ’’حاتم‘‘ کے لیے منیر حسین نے ’’ تیرے محلوں کی چھاؤں میں قرار اپنا لٹا بیٹھے‘‘ گایا اور بعد میں ان کی آواز کو اپنے وقت کے نام ور موسیقار رشید عطرے، خواجہ خورشید انور اور اے حمید نے بھی اپنی دھنوں کے ساتھ آزمایا۔ منیر حسین نے انھیں مایوس نہ کیا اور فلم انڈسٹری میں آگے بڑھتے چلے گئے، اپنے وقت کے مشہور موسیقاروں کے علاوہ فلم سازوں نے بھی ان کے فن اور آواز کو سراہا۔
رشید عطرے کی موسیقی میں منیر حسین کی آواز میں ’’قرار لوٹنے والے قرار کو ترسے ملک بھر میں مقبول ہوا اور اس کے بعد نثار میں تری گلیوں پہ، دلا ٹھیر جا یار دار نظارا لیندے، اور اس شہر خرابی میں غم عشق کے مارے جیسے گیتوں نے منیر حسین کو مزید شہرت دی، خواجہ خورشید انور کی موسیقی میں رم جھم رم جھم پڑے پھوار جیسا مقبول گیت فلم کوئل میں شامل تھا جسے منیر حسین نے گایا۔ وہ اپنے وقت کے مقبول گلوکاروں میں سے ایک تھے جنھیں بہت عزّت اور پذیرائی ملی۔
گلوکار منیر حسین کو لاہور میں مومن پورہ کے قبرستان میں سپردِ خاک کیا گیا۔
