The news is by your side.

Advertisement

انتظامی جھگڑوں نے کراچی کو کچرہ کنڈی بنادیا، تجارت کا پہیہ جام ہوگیا، سراج الحق

کراچی : امیر جماعت اسلامی سینیٹر سراج الحق نے کہا ہے کہ انتظامی جھگڑوں نے شہر کراچی کو کچرہ کنڈی بنادیا، صنعت و تجارت کا پہیہ بھی جام ہوچکا ہے۔

یہ بات انہوں نے ادارہ نورحق کراچی میں ملاقات کیلئے آنے والے جماعت اسلامی کے وفد سے گفتگو کرتے ہوئے کہی، انہوں نے کہا کہ کوڑے کے ڈھیروں پر کتوں کا بسیرا کراچی انتظامیہ کا منہ چڑارہا ہے۔

سراج الحق نے کہا کہ لوڈشیڈنگ، گندا پانی، بےروزگاری اور بدامنی کراچی کی پہچان بن گئی ہے، وفاق، صوبے اور کراچی انتظامیہ جھگڑوں نے شہر کو کچرہ کنڈی بنادیا ہے، حکمران دورے اور اعلانات کرتے ہیں لیکن ان پر عملدرآمد نہیں ہوتا۔

امیر جماعت اسلامی کا کہنا تھا کہ کراچی کی صنعت و تجارت کا پہیہ جام ہے، اس پر ستم یہ کہ کراچی کے سرمایہ کار اپنا کاروبار سمیٹ کر باہر منتقل ہورہے ہیں، ملک کا مسلسل دوسرا صدر کراچی سے تعلق رکھتا ہے، لیکن شہر کی حالت میں آج تک بہتری نہیں آئی۔

وفد سے گفتگو کرتے ہوئے انہوں نے کہا کہ حکومت نے کراچی کو روشنیوں کا شہر بنانے کے دعوے کیے تھے، حکمران جماعتیں الزام لگاتی ہیں، ذمہ داری کا کسی کو احساس نہیں، کراچی کیلئے خدمت خلق کے جذبے سے سرشار قیادت کی ضرورت ہے۔

ان کا مزید کہنا تھا کہ سندھ کی صوبائی حکومت بھی آئے روز عوام سے دعوے اور وعدے کرتی رہتی ہے، کراچی کی ضلعی حکومت اور انتظامیہ بھی کراچی کے شہریوں کو سہانے خواب دکھاتی ہے مگرشہر کی حالت پہلے سے بھی زیادہ ابتر ہورہی ہے۔

Comments

یہ بھی پڑھیں